Сеул марказий округ суди Жанубий Корея президенти Юн Сок Ёлнинг ҳибсга олинишини қонуний деб топди. Бу ҳақда Yonhap агентлиги хабар берди.
16 январь куни маҳаллий вақт билан соат 17:00 да суд Юн Сок Ёлнинг ҳимоячилари мурожаатини кўриб чиқишни бошлади.
Аввалроқ президент адвокатлари юқори мансабдор шахсларга нисбатан коррупцияга қарши тергов бошқармаси қамоққа олиш ордерини Сеулнинг Ғарбий округ судидан эмас, балки Марказий округ судидан олиши кераклигини таъкидлаган эди. Уларнинг фикрича, қамоққа олиш учун ордер олган бошқарма исёнга оид шубҳаларни текшириш ваколатига эга эмас. Бошқарманинг ўзи исён жинояти ваколатларни суиистеъмол қилиш билан боғлиқлигини таъкидлаган.
Суд ҳимоячиларнинг барча далилларини рад этди. Шунингдек, судьялар “парламентга оз сонли ҳарбийларнинг кириши конституциявий тузумни бузиш ҳисобланмайди” деган баёнотни асоссиз деб топди.
15 январь куни Жанубий Кореяда терговчилар иккинчи уринишда Юн Сок Ёлни ҳибсга олди.
Ҳокимиятдан четлатилган президентни ҳибсга олишга биринчи уриниш 3 январь куни содир бўлганди. Бироқ ўшанда Юн Сок Ёлнинг қўриқчилари полиция ҳибсга олишига қаршилик қилган, узоқ давом этган қарама-қаршиликдан сўнг, терговчилар президентни Коррупция бўйича тергов бюросига олиб боришга муваффақ бўлди.
Юн Сок Ёл ушлангунга қадар видеомурожаат эълон қилиб, ҳибсга олишни “ноқонуний” деб билиши, аммо қон тўкилишининг олдини олиш учун терговчилар ва полицияга бўйсунишга қарор қилганини айтган.
Декабрь ойи бошида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди, шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган, аммо уни лавозимидан четлаштириш учун импичмент Конституциявий суд томонидан маъқулланган бўлиши керак. Суд қарор чиқармагунча, Юн Сок Ёл расман президент бўлиб қолади.
Юннинг ўзи декабрнинг биринчи ярмидаёқ қўзғолонга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Президент адвокатларининг ҳибсга олишнинг қонунийлигига эътироз билдиришга уриниши туфайли унинг 48 соатлик қамоқ муддати тўхтатилганди. Кейинги ҳибсга олиш учун янги ордер керак.
Изоҳ (0)