28 ёшида фан доктори, 30 ёшида профессор илмий унвонига сазовор бўлган Элёржон Жумаевнинг номи АҚШ, Жанубий Корея ва Европа мамлакатлари илмий доираларида яхши таниш. У 350 дан ортиқ янги турдаги материалларни кашф этган, 10 га яқин халқаро патентларга эга.
Қашқадарёнинг Нишон туманида зиёли оиласида туғилган Элёржоннинг илмий ишланмалари Hyundai Моtors, Samsung, NASA ва Оаk Ridge каби компания ва ташкилотларнинг ишлаб чиқариш жараёнларига татбиқ этилган. Жорий йилнинг март ойида АҚШнинг Лас-Вегас шаҳрида бўлиб ўтган ТМS Аnnual Meeting – 2025 Бутунжаҳон конференциясида Элёржон Жумаев раҳбарлигидаги ўзбек олимларининг илмий иши 1-ўринга сазовор бўлди.
— Мазкур анжуман АҚШнинг Металл, минераллар ва материаллар ташкилоти томонидан ҳар йили анъанавий тарзда ўтказиб келинади ва шу соҳаларда ишлаётган етакчи олимлар ва илмий ташкилотларни жалб этади. Бу йил конференцияда 4 минг нафардан ортиқ олим қатнашди. Ўзбекистон жамоаси “Юқори энтропияли қотишмаларнинг микроструктураси ва механик хоссаларига турли иссиқликдаги тоблаш (annealing) давомийликларининг таъсири чуқур таҳлили” мавзусидаги илмий иш билан иштирок этди.
Кашфиётимизда янги турдаги замонавий материалларнинг юқори ҳароратга чидамлилигини таъминлаш йўллари ёритиб берилган. Уларнинг механик хусусиятларини сақлаган ҳолда, нано ўлчамда структуравий ўзгаришлари баён этилган. Тадқиқотимиз материалшунослик йўналишидаги долзарб муаммоларга ечим таклиф қилгани учун халқаро ҳакамлар ҳайъати томонидан биринчи ўринга лойиқ кўрилди, дейди Элёржон Жумаев.
Бу ютуқ автомобилсозлик, металлургия, кемасозлик саноатларида, умуман юқори ҳароратга чидамли материаллар ишлатиладиган тармоқларда кенг қўлланилиши мумкин. Янги материаллар коррозия ва эрозияга бардошли бўлиб, узоқ вақт хизмат қилиши билан аҳамиятли.
— АҚШда ўтказиладиган ушбу анжуманнинг нуфузини соҳада фаолият олиб бораётган олимлар яхши билади. Унда биринчи ўринни олиш мен учун катта шараф. Бу Ўзбекистонлик ёшлар нафақат спорт ёки санъат, балки илм-фан йўналишида ҳам оламшумул ғалабаларни қўлга киритишга қодир эканидан далолат. Биз тақдим этган кашфиётга ҳозирданоқ дунёнинг йирик ишлаб чиқариш компанияларидан қизиқиш билдирилмоқда. Илмий ишланмаларимиз Ўзбекистон саноатида ҳам кенг қўлланилишини хоҳлаймиз, дейди у.
Ўзбек олимларининг ютуғига бағишланган видеолавҳани YouTube’даги саҳифамизда томоша қилишингиз мумкин.
Изоҳ (0)