Жанубий Корея президенти Юн Сок Ёл ўз хавфсизлиги учун хавотирдалиги сабабли Конституциявий суд томонидан импичмент иши бўйича биринчи расмий муҳокамада иштирок этмайди. Бу ҳақда Корея етакчисининг адвокати Юн Гапген маълум қилди.
“Юнни ҳибсга олиш учун ноқонуний ва ҳақиқий бўлмаган ордерни бажаришга уринишлар давом этаётган бир пайтда, биз президентнинг шахсий хавфсизлиги ва унга қарши эҳтимол тутилган провокациялардан хавотирдамиз”, деди адвокат.
У давлат раҳбари суд мажлисларида иштирок этиши учун унинг шахсий хавфсизлиги таъминланиши зарурлигини билдирди. Юн адвокатлари таъкидлашича, президент мамлакатда ҳарбий ҳолат эълон қилиниши билан боғлиқ вазиятда ўз нуқтаи назарини ва қарорларини асослаш учун қулай вақтда импичмент иши бўйича суд жараёнига боради.
Конституциявий суд 14 январь куни президент импичменти бўйича суд жараёнида оғзаки мунозараларни бошлашни ва 4 февралга қадар бешта эшитувни ўтказишни режалаштирган. Агар Юн суд мажлисига келмаса, суд мажлисни тўхтатиши ва 16 январь куни иккинчи суд муҳокамасини эълон қилиши керак бўлади.
Кореяда илк бор амалдаги президент ҳибсга олинади
Сеулнинг Ғарбий округ суди 31 декабрь куни президент Юн Сок Ёлни ҳибсга олиш учун ордер берди. Бунга лавозимидан четлатилган президент қўзғолонга раҳбарлик қилиш ва ҳокимиятни суиистеъмол қилишда айбланиб, уч марта сўроққа келмагани сабаб бўлди. Бу Жанубий Корея тарихида амалдаги давлат раҳбарига ҳибсга олиш учун ордер берилган биринчи ҳолатдир. Yonhap хабарига кўра, тинтув учун ордер ҳам берилган.
Президент ҳарбий ҳолат жорий этишга урингани учун ҳокимиятдан четлаштирилганди
Жанубий Корея парламенти 14 декабрь куни Юн Сок Ёлни ҳокимиятдан четлатди. Бунга давлат раҳбари томонидан 3 декабрь куни сиёсий мухолифларга қарши курашиш мақсадида эълон қилинган ҳарбий ҳолат сабаб бўлди. Юннинг қарори жамоатчиликнинг норозилигига сабаб бўлди, парламент ҳарбий ҳолатни тезда бекор қилишга муваффақ бўлди.
Президент вазифасини бажарувчи дастлаб мамлакат бош вазири Хан Док Су бўлди. Бироқ 27 декабрь куни Жанубий Корея парламенти уни ҳам ҳокимиятдан четлатишга овоз берди. Президент вазифасини бажарувчи лавозимида унинг ўрнини бош вазирнинг биринчи ўринбосари, иқтисодиёт ва молия вазири Чхве Сан Мок эгаллади. У барқарорликни тиклаш унинг сиёсатининг устувор йўналиши эканини билдирди.
Жанубий Кореяда ҳарбий ҳолат эълон қилинишига алоқадор бўлган бир неча амалдорлар, жумладан, собиқ мудофаа вазири Ким Ён Хён ва бир неча юқори мартабали ҳарбий разведка ходимлари ҳибсга олинган.
Изоҳ (0)