Жанубий Корея полицияси мамлакат жануби-шарқида кенг кўламли ўрмон ёнғинларига сабаб бўлган ўрмонга ўт қўйишда гумон қилинаётган 56 ёшли эркакни қўлга олди. Бу ҳақда Yonhap агентлиги хабар бермоқда.
Қўлга олинган шахс 22-март куни соат 11:25 атрофида Шимолий Кёнсан вилоятининг Уисон туманидаги тепаликда жойлашган оилавий қабрда аждодларни хотирлаш маросимини ўтказаётганда ёнғин чиқарганликда айбланмоқда. Кучли шамол ва қуруқ об-ҳаво туфайли олов тезда яқин атрофдаги Андон, Чхонсон, Ёнян ва Ёндок шаҳарларига тарқалиб, 27 кишининг ҳалок бўлишига олиб келди.
Ўрмон ёнғини 4000 га яқин иншоотни, жумладан, ЮНЕСКОнинг Бутунжаҳон мероси рўйхатига киритилган Гоун ибодатхонасини, турар-жой бинолари, заводлар ва бошқа объектларни вайрон қилган. 20 мингдан ортиқ аҳоли ўз ҳудудларидан кўчиб кетишга мажбур бўлган. Офатга қарши курашга 5 мингга яқин ҳарбий хизматчи ва 146 та вертолёт жалб этилган.
Полиция маълумотларига кўра, гумонланувчи ўз айбини тан олмаган.
Корея ўрмон хизмати Шимолий Кёнсан вилоятидаги ўрмон ёнғинлари 28-март куни соат 17:00 ҳолатига кўра тўлиқ назоратга олинганини маълум қилганди, бироқ 29-мартга ўтар кечаси улар яна кучайиб кетган. 30-март ҳолатига кўра, ёнғин 99 фоизга назорат остига олинган. Ҳукумат 50 та вертолёт, 1500 га яқин одам ва 213 та транспорт воситасини сафарбар этган.
Ўрмон хўжалиги агентлиги маълумотларига кўра, Жанубий Кореядаги энг йирик ўрмон ёнғини оқибатида 48 минг гектарга яқин ўрмон майдони, яъни Сеул майдонининг тахминан 80 фоизи куйиб кетган.
Изоҳ (0)