2024 йил декабрь ойида мамлакатда ҳарбий ҳолат эълон қилган Жанубий Корея президенти Юн Сок Ёл фуқаролардан узр сўради. Бу ҳақда сиёсатчининг республика конституциявий судидаги баёнотига таяниб, Yonhap хабар берди.
Аввало афсусда эканимни айтмоқчиман, шунингдек, халқдан миннатдорман, деди у.
Сиёсатчи гарчи миннатдорчилик туйғусини ҳис қилган бўлса-да, унга берилган вақт ичида ўз ишини бажара олмагани уни афсуслантирганини таъкидлади.
Президентнинг импичмент масаласи кўриб чиқилаётган йиғилишда унинг ҳимоячиси ҳарбий ҳолат икки соатдан кейин бекор қилингани ва “фармон эълон қилинган ва бекор қилинган даврда бирорта ҳам фуқаро жабрланмагани”ни айтди. Адвокат Ли Дон Чан судда Юн парламентдаги мухолифат ҳаракатлари муносабати билан низом киритганини маълум қилди.
Yonhapънинг ёзишича, суд қарорни икки ҳафта ичида, тахминан март ойи ўрталарида чиқариши мумкин.
Юн Сок Ёлнинг ҳибсга олиниши
15 январь куни Жанубий Кореяда терговчилар иккинчи уринишда Юн Сок Ёлни ҳибсга олди. Ҳокимиятдан четлатилган президентни ҳибсга олишга биринчи уриниш 3 январь куни содир бўлганди. Бироқ ўшанда Юн Сок Ёлнинг қўриқчилари полиция ҳибсга олишига қаршилик қилган. Иккинчи уринишда эса узоқ давом этган қарама-қаршиликдан сўнг, терговчилар президентни Коррупция бўйича тергов бюросига олиб боришга муваффақ бўлди.
Юн Сок Ёл ушлангунга қадар видеомурожаат эълон қилиб, ҳибсга олишни “ноқонуний” деб билиши, аммо қон тўкилишининг олдини олиш учун терговчилар ва полицияга бўйсунишга қарор қилганини айтган.
Декабрь ойи бошида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди, шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган. Унинг ўзи декабрнинг биринчи ярмидаёқ қўзғолонга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Президент адвокатларининг ҳибсга олишнинг қонунийлигига эътироз билдиришга уриниши туфайли унинг 48 соатлик қамоқ муддати тўхтатилганди. Кейинги ҳибсга олиш учун янги ордер чиқарилган.
Изоҳ (0)