Жанубий Кореянинг қўшма тергов гуруҳи президент Юн Сок Ёлни қамоққа олиш учун судга мурожаат қилди. Бу унинг ҳарбий ҳолат эълон қилиши бўйича сўроққа чақирувларни бир неча марта рад этгани ва импичмент натижасида ваколатлари тўхтатилгани ортидан амалга оширилди.
Жанубий Кореянинг коррупцияга қарши курашиш идораси, полиция ва мудофаа вазирлиги вакилларидан иборат қўшма тергов гуруҳи Сеул судига президент Юн Сок Ёлни ҳибсга олиш учун ариза берди, деб хабар бермоқда “ТАСС”. Ариза 30 декабрь куни, президент учинчи марта исён иши бўйича сўроққа чақирувни эътиборсиз қолдиргач, топширилди.
Аввалроқ Юн Сок Ёл мамлакатда ҳарбий ҳолат эълон қилган эди. Бироқ бу қарор олтита соатдан сўнг бекор қилинган. Жанубий Корея қонунларига кўра, давлатга хиёнат ёки исён билан боғлиқ бўлган ҳолатларда амалдаги президентга қарши жиноий таъқиб ўтказилиши мумкин.
14 декабрь куни Жанубий Корея парламенти Юн Сок Ёлга импичмент эълон қилишга қарор қилди. Натижада унинг президентлик ваколатлари вақтинча тўхтатилди. Энди президентнинг тақдирини Конституциявий суд ҳал қилади. Суд импичментни тасдиқлаш ёки уни лавозимга қайтариш ҳуқуқига эга.
Маълумот учун, Жанубий Корея парламенти президент вазифасини бажарувчи ва айни пайтда бош вазир лавозимини эгаллаб турган Хан Док Суга нисбатан ҳам импичмент учун овоз берган.
Ҳозирги пайтда молия вазири Чой Санг Мок вақтинчалик президент сифатида хизмат қилмоқда.
Изоҳ (0)