Кўпчилик янги маҳсулотларни харид қилишни афзал кўрса-да, баъзи буюмларни ишлатилган ҳолатда сотиб олиш янада фойдали бўлиши мумкин. Фойдаланилган буюмлар арзонроқ бўлиши билан бирга, баъзан уларнинг сифати ҳам юқори бўлади. Қуйида янги эмас, балки ишлатилган ҳолда сотиб олиш яхшироқ бўлган 8 та предмет ҳақида сўз юритамиз.

Болалар кийимлари ва ўйинчоқлари
Болалар тез улғаяди, шунинг учун уларнинг кийимлари ва ўйинчоқлари кўпинча деярли янги ҳолатда сақланади. Ўтган йилда болани яхши иситган куртка кейинги йилда бошқа болани худди шундай иссиқ сақлай олади. Фақат бир мавсум давомида кийилган болалар кийимлари ёки кам ўйналган ўйинчоқларни сотиб олиш нафақат молиявий жиҳатдан фойдали, балки экологик жиҳатдан ҳам маъқул вариант ҳисобланади.

Китоблар
“Ҳар йили турли ўқув дастурини ўзида жамлаган китобларни, агар имкон бўлса, ишлатилган ҳолда харид қилиш керак. Уларни эски китоб дўконларидан топиш мумкин. Албатта, фойдаланилгандан сўнг, мазкур китобларни бошқаларга сотиш ва оз бўлса-да, даромад кўриш мумкинлиги ҳақида ҳам ўйлаб кўриш зарур”, дейди савдо бўйича мутахассис Сара Скирболл.
Заргарлик буюмлари
“Заргарлик буюмлар коллекциянгизни тўлдирмоқчимисиз? Унда тақинчоқлар дўконига боришдан аввал Ломбард вариантини кўриб чиқинг. Сабаби, у ерда сақланадиган заргарлик буюмлари, айниқса, олмос ва зумрадларни қайта сотиш нархи жуда паст бўлади”, дейди шахсий молия тизими бўйича мутахассис Тиаго Пита.
Мебел
Янги мебел харид қилиш қимматга тушади, айниқса у сифатли материаллардан тайёрланган бўлса. Қисқа муддат фойдаланилган мебелни сотиб олишда асосан, сифатли ва мустаҳкам мебелларга дуч келамиз ва уларнинг яна бир неча йил хизмат кўрсата олишини амалда синаб кўрган бўламиз.
Электр жиҳозлари
Смартфон, ноутбук ёки телевизор каби маиший техникалар янги ҳолатда қиммат бўлиши мумкин. Бироқ қисқа муддат ишлатилган электроника кўпинча яхши ҳолатда бўлади ва уларни арзонроқ нархда сотиб олиш мумкин.
Спорт анжомлари

Спорт жиҳозлари кўпинча узоқ муддат фойдаланилмайдиган анжомлар саналади. “Кўпинча одамлар югуриш йўлакчасини сотиб олиб, уни бир неча марта ишлатгач, бурчакка қўйиб, устига кийим ташлаб қўйишади. Кейин эса катта жой эгаллаган керакcиз буюмдан онлайн платформаларда халос бўлишни исташади. Бундай пайтда биз деярли янги ҳолатдаги, аммо арзон нархдаги спорт анжомларини харид қилиш имкониятига эга бўлишимиз мумкин”, дейди Ари Киммелфелд — эски спорт ускуналарини сотиб олиш, сотиш ва етказиб беришга ихтисослашган онлайн-дўкон асосчиси.
Интерер декор буюмлари
Хоналарни безатиш учун мўлжалланган декоратив предметларни харид қилиш нафақат иқтисодий жиҳатдан фойдали, балки кўпинча винтаж ёки антик буюмларни топиш имконини беради. Янги декор буюмларидан кўра ишлатилганлари кўпроқ тарихий қийматга эга бўлиши мумкин.
Изоҳ (0)