Ҳар биримиз кийимни дазмоллаганда баъзан матонинг юзасида ёқимсиз ялтироқ доғлар пайдо бўлишига дуч келамиз. Айниқса, тўқ рангли ёки нозик матоли кийимларни эҳтиётсизлик билан дазмоллаш уларнинг табиий кўринишини бузиши мумкин. Бу муаммо кўпчилик учун таниш бўлса-да, уни бартараф этишнинг самарали усуллари бор. Ушбу мақолада дазмолдан қоладиган ялтироқ доғларнинг сабаблари ва уларни йўқотиш бўйича тавсиялар берамиз.
Нима учун дазмолдан кейин кийимда ялтироқ доғлар қолади?
Одатда дазмолдан кейин ялтироқ доғ полиэстр каби синтетик толалардан тикилган кийимларда қолади. Чунки бундай кийимларни дазмолнинг мос ҳароратини ўрнатмасдан текислаймиз ва бунинг натижасида мато толалари сарғайиб кетади. Агар кийим вискозадан тикилган бўлса, ҳатто куйиб кетиши мумкин.
Оқ кийимда қолган доғ сарғиш тусда куйган изга ўхшайди, қора кийимда эса ялтироқлик пайдо бўлади. Аммо махсус воситалар ёрдамида бундай доғларни осонгина тозалаб олиш мумкин.
Доғларни кимёвий воситаларсиз кетказиш
Бунинг учун бизга қуйидагилар керак бўлади:
- пиёз
- сут
- лимон шарбати
- бор кислотаси
- сирка
Ялтироқ доғларни бартараф этишнинг энг осон усули бу пиёздан фойдаланишдир. Бунинг учун пиёзни майда қилиб тўғраш ва бўтқа ҳолатига келтириш лозим. Сўнг пиёз массасини ялтироқ доғ ўрнига бир неча соатга қолдириш керак. Кейин эса кийимни совуқ сувда чайиб, хона ҳароратидаги сувда ювиш мумкин.
Агар ялтироқ доғ жуда катта ва қуюқ бўлмаса, уни оддий сут орқали тозалаш мумкин. Бунинг учун кийимни икки ёки уч стакан сутга ботириб, кейин одатдагидек ювиш кифоя.
Агар синтетик буюмдаги дазмолдан қолган доғ яқинда пайдо бўлган бўса, уни лимон шарбати билан ёки бор кислотаси эритмаси билан тозалаш мумкин. Бундай эритмани тайёрлаш осон: бор кислотасини 1:1 нисбатда илиқ сув билан аралаштиринг ва кийимни ушбу суюқликка 10-15 дақиқага ботириб қўйинг.
Оқ рангли табиий матолардан тикилган ялтироқ доғларини тозалаш учун водород пероксиди ва новшадил спирти аралашмасини қўлланг. Бунинг учун 1 чой қошиқ пероксид ва 3-4 томчи 10% спиртни қўшинг, 1/2 стакан сувда эритилган массани дока ёрдамида доғлар бор жойга суртинг ва бир неча дақиқага қолдиринг. Сўнг кийимни совуқ сувда ювиб, яна дазмолланг. Ёдингизда бўлсин, бу усул фақат пахта толали ва табиий матолардан тайёрланган оқ кийимлар учун мос келади.
Қора кийимда қолган дазмол доғларини кетказишда сирка ёрдам беради. Бунинг учун тоза докани 10% сирка эритмасига солинг, уни доғ устига қўйинг. Сўнг дазмолнинг ҳароратини кўтариб, кийимни яхшилаб дазмолланг.
Умуман олганда, қора кийимларни фақат тескари томондан дазмоллаш лозим, шунда шим каби тўқ рангли кийимларда куйиш излари пайдо бўлмайди.
Изоҳ (0)