Инсонлар учун сартарошхонага бориш дам олиш ва ўзини тартибга келтиришнинг бир усулидир, аммо гўзаллик салони синдроми (ГСС) деб номланувчи камдан-кам учрайдиган ҳолат борки, у сочларни ювиш натижасида юзага келиши мумкин.
Тадқиқотларга кўра, сартарошхоналарда соч ювдирганда бош ва бўйиннинг ноқулай ҳолатда туриши оғриқ, шикастланиш ва жуда оғир ҳолатларда инсультга олиб келиши мумкин.
Гўзаллик салони синдроми биринчи марта 1993 йилда америкалик невролог Майкл Вайнтрауб томонидан ёритилган. У баъзи беморларда сочларини салонда ювгандан кейин инсульт билан боғлиқ аломатлар пайдо бўлганини аниқлаган.
Инсульт — бу қон оқимининг кескин камайиши натижасида мияда қон айланишининг бузилиши. Касаллик томирда тромб ҳосил бўлиши, ёрилиши ёки қон кетиши туфайли юзага келади. Иккала ҳолатда ҳам мияга етарли миқдорда кислород етиб бормайди, бу эса ҳужайранинг шикастланишига ёки ўлимга олиб келади.
Гўзаллик салони синдромининг асосий сабаби сочларни ювишда бош ва бўйинни раковинанинг қаттиқ четига эгишдир. Бундай ноқулай ҳолат, бўйиннинг узоқ шундай қолиб кетиши ёки кескин ҳаракатлар мияни қон билан таъминлайдиган йирик қон томирларини сиқа бошлайди. Инсульт кўпинча кекса одамларда ёки гипертонияси борларда кузатилса-да, гўзаллик салони синдроми ҳатто ёш ва соғлом одамларда ҳам пайдо бўлиш эҳтимоли йўқ эмас.
ГСС камдан-кам учрайдиган синдром, аммо унинг белгиларини билиш олиш зиён қилмайди. Симптомларга бош оғриғи, бош айланиши, кўз олдининг хиралашиши, кўнгил айниши, қайт қилиш, бўйин оғриши, тананинг бир томонида заифлик ёки фалажлик кабилар киради. Бундай аломатлар дарҳол пайдо бўлмаслиги мумкин.
Қуйидаги эҳтиёт чоралар ГСС нинг олдини олишга ёрдам беради:
- Сартарошдан сочингизни орқага эмас, балки олдинга эгилган ҳолда ювишни сўраш;
- Агар бунинг иложи бўлмаса, бўйиннинг тагига махсус ёстиқ ёки рулон шаклига келтирилган сочиқдан фойдаланиш;
- Кескин ҳаракатлардан ва узоқ вақт давомида ноқулай ҳолатда қолишдан қочиш.
Изоҳ (0)