Декабрь ойи бошида Майамида бўлиб ўтган мода ва санъат ҳафталигида рассом Ивенс Сент Клер қиймати 1,2 миллион доллар бўлган қимматбаҳо аёллар сумкасини тақдим этди. Санъат асари сифатида баҳоланган ноёб сумка ўзининг ноодатий дизайни ва ишлаб чиқариш тарихи билан барча меҳмонларни ҳайратда қолдирди.
Мазкур аксессуарни ясаш учун Сент Клер Япониядаги маҳаллий ёғоч ўймакорлари билан учрашишга қарор қилган ва у ерда икки йил давомида ушбу санъат соҳаси билан яқиндан танишган. Сўнг олган билимлари асосида сумка учун махсус япон ёғочидан ўз қўллари билан рама ясаган.
Сумканинг асоси Италия чарми ва кимоно тикиш учун мўлжалланган ноёб ипак матолари билан ишланган. Шунингдек, сумка олтин, зумрад ва 18 каратли олмос тошлар билан безатилган.
Маълум бўлишича, бундай ҳашаматли аксессуарни ишлаб чиқариш учун рассом бир йилдан ортиқ вақт сарфлаган. Бу давр ичида сумка Япония, Гвинея, Италия ва Туркия бўйлаб “саёҳат қилган” ва маҳаллий ҳунармандлар унинг махсус дизайнини яратишда ўз ҳиссасини қўшган.
“Мен ҳунармандчилик санъатини ҳозирги даврда ҳам ўз қадрини йўқотмаслигини ва янада ривожланишини истайман. Бугунги кунда барча нарсаларни иложи борича арзонлаштириш учун Хитойга юборилади, аммо ҳақиқатда ноёб буюмлар улгуржи савдо учун ишлаб чиқарилмайди. Мен узоқ йиллик саёҳатлар, тадқиқотлар ва инновацияларимни ушбу асарларга жо қилдим, чунки мен гўзалликка, бахтга ва меҳнатим зое кетмаслигига ишонаман”, дейди Сент Клер.
Рассомнинг айтишича, унинг сумкалари сармоя киритиш учун энг яхши предметдир, чунки олтин, олмос ва қимматбаҳо тошларнинг қиймати йиллар давомида фақатгина ошиб боради.
Изоҳ (0)