Spice Girls мусиқий гуруҳининг собиқ аъзоси Виктория Бекҳэм ўзининг муваффақиятли карьераси, намунали оиласи ҳамда гўзалликни сақлаб қолиш учун қатъий турмуш тарзига риоя қилишга куч топа олгани билан барчага ўрнак бўла олади. Виктория кундалик овқатланиш тартибини доим назорат қилади, мунтазам равишда ҳаракатда бўлади ва ўз устида ишлашдан тўхтамайди. Бунинг натижаси эса унинг гўзал ва сарвқомат кўринишида акс этмоқда.
Викториянинг ўзи айтганидек, бундай кўринишни сақлаб қолиш аввалдан режалаштирилган кундалик тартибга риоя қилиш ҳамда фидойиликни талаб этади.
Бекҳэм хонимнинг куни эрталаб соат 5:30 да бошланади. У биринчи навбатда югуриш йўлакчасида спорт машғулотлари билан шуғулланади. Виктория аввало тез-тез қадамлар билан югуради, кейин ўртача ритмда югуришда давом этади. Тахминан 7 километр масофа босиб ўтилгач, юлдуз оғирроқ машқларга ўтади. 30 дақиқа давомида у қорин, оёқ ва қўллари учун спорт машқларини бажаради. Тонгги бадантарбияни тугатгач, Виктория гигиеник ишларга ўтади ва ўзи учун нонушта тайёрлайди.
Виктория тонгни икки чой қошиқ олма сиркаси ва сувдан бошлайди. Бу унинг танасини тозалашга ва метаболизмни яхшилашга ёрдам беради. Нонушта учун дон ва чиа уруғидан тайёрланган смузи ичади. Шунингдек, юлдуз ҳар куни витамин ва антиоксидантларга бой авокадо ва озгина ёнғоқ истеъмол қилади. Агар кун давомида очлик безовта қилса, юлдуз бир бўлак бутун донли ундан тайёрланган нонни туз сепиб истеъмол қилиши мумкин.
Тушлик ва кечки овқат учун тадбиркор одатда доим бир хил таомни истеъмол қилади. Унинг турмуш ўртоғи Девид Бекҳэмнинг сўзларига кўра, Виктория 25 йил давомида ҳар куни лосос балиғи ва сарсабил (спаржа) истеъмол қилади. Ушбу таомни у иккига бўлиб, маълум вақт орасида ейди. Тушликдан кейин бир неча соат ўтгач Виктория яна спорт машғулотларига шўнғиб кетади.
Кун давомида у уй юмушлари ва тадбиркорлик фаолияти билан боғлиқ ишлар билан шуғулланади ва соат 18:00 атрофида кечки овқат тайёрлайди. Викториянинг спорт машғулотлари ҳафтасига 6 кун давом этади. Фақатгина бирор тадбир ёки жиддий сабаблар туфайли истисно кунлар бўлиши мумкин. Оддий одам бундай кун тартибига амал қилиши мушкул, аммо Виктория Бекҳэм узоқ йиллар давомида бунга амал қилиб келмоқда.
Аммо юлдузнинг бундай оғир машғулотлари ва жуда кам калория истеъмол қилиш талаб этиладиган одати барчага бирдек мос келмайди, чунки калориялар чеклови ва машаққатли спорт баъзи аёллар саломатлигига зарар етказиши мумкин.
Шу сабабли машҳурларнинг кўрсатмаларига кўр-кўрона амал қилиш ўрнига, шифокорлар ва ишончли фитнес мураббийлар маслаҳатларига қулоқ тутган маъқул. Улар ҳар бир одам учун индивидуал бўлган ва соғлиққа зарар етказмай озишга ёрдам берадиган тавсияларни беради. Қолаверса, мустаҳкам саломатлик учун рационда хилма-хил озиқ-овқатлар бўлиши, жумладан, нафақат оқсиллар ва ўсимлик толалари, балки ёғлар ва углеводлар ҳам бўлиши муҳим. Вақти-вақти билан ўзингизни озгина ширинлик билан сийлашнинг ҳеч ҳам ёмон жиҳати йўқ.
Изоҳ (0)