Хонадонимизнинг тозалиги оила аъзоларини зарарли микроблар ва бактериялардан ҳимоя қилишга ёрдам берадиган ҳаётимизнинг ажралмас бўлагидир. Уй юмушларини бажаришда асосан энг кўп кириладиган хоналар ва тез-тез ишлатиладиган нарсаларга алоҳида эътибор қаратиш лозимлигини биламиз. Аммо баъзилар тозалаш ишларида қуйидаги хатоликларни такрорлаб туради. Улар саломатлик учун хавф туғдириши мумкин.
Идишларни ва ошхона мебелларини артиш/ювиш учун бир хил губкадан фойдаланиш
Идишларни ювишда губкалар бекаларнинг энг яхши ёрдамчисига айланган, аммо у уйдаги энг ифлос предметлардан ҳусобланади. Вақтида янгиланмаган губкада турли микроблар йиғилиши, жумладан, ичак таёқчаси, салмонелла касаллиги авж олиши учун иссиқ ва нам муҳит яратади. Шу сабабдан ҳам уни ҳар ҳафтада янгилаб туриш лозим, йўқса ювилган идиш, стол юзаси ва ошхонанинг бошқа ерларида микроб кўпайишига олиб келади. Губкани микротўлқинли печда ёки идиш ювиш машинасида дезинфекция қилиш фойда бермайди.
АҚШ Миллий Санитария Жамғармаси томонидан ўтказилган тадқиқотга кўра, ошхонадаги губка 75% дан ортиғи колиформ бактериялар билан ифлосланган бўлади, бу эса ошқозон-ичак трактида катта муаммоларни келтириб чиқариши мумкин. Бундай микроорганизмлар илиқ ва нам муҳитда ҳафталар ва ҳатто ойлар давомида яшаб қолиши мумкин. Чунки битта губка билан хом гўшт, парранда, денгиз маҳсулотлари ва тухум кабилардан фойдаланган идишларни ювамиз.
Идишларни ювиб бўлгач, раковинани тозаламаслик
Ошхона раковинаси уйдаги энг ифлос юзалардан биридир. Тадқиқотлар шуни кўрсатадики, тозаланмаган раковиналарнинг 45 фоизида салмонелла каби колиформ бактериялар мавжуд. Масалан, гўшт кесиш тахтачасидан фойдалангандан сўнг раковинани дезинфекция қилмасангиз ва ундан фойдаланишда давом этсангиз, бактериялар бошқа идиш-товоқларга юқиш хавфи бор.
Хом гўштдаги бактериялар канализацияда тўпланади ва ундан қутулишнинг ягона усули — дезинфекцияловчи восита билан ювиш.
Музлатгични тозалашда унинг ички қисмини қолдириб кетиш
Музлатгичингизнинг ташқи қисмини мунтазам артиб туриш билан бирга унинг тортмаларига, гўшт сақланадиган жойларига ҳам аҳамият бериш лозим. Музлатгичнинг паст ҳароратга қарамай, унда турли бактериялар ва бошқа зарарли организмлар бўлиши мумкин. Энг кўп ифлосланган жойлар бу сабзавот солинадиган қисмлар ҳамда гўшт солинадиган бўлимлардир. У ерда вақ ўтиб салмонелла, листерия бактериялари юзага келиши ёки моғорлаши мумкин.
Америка клининг институти музлатгичнинг ички қисмини тозалаш учун сода эритмасидан фойдаланишни тавсия қилади.
Душни тозалашда унинг насадка қисмини унутиб қолдириш
Сил касаллигини келтириб чиқарадиган микобактериялар душнинг айнан сув келадиган тирқишларида тўпланиб қолади. Тадқиқотлар шуни кўрсатадики, бундай бактериялар ифлосланган душдаги сув орқали ўпкага етиб бориши мумкин, шунинг учун уни тозалашни унутмаслик керак.
Уйларни тозалаш пайтида деразаларни очмаслик ва ҳаво алмаштирмаслик
Тозалаш воситаларида мавжуд бўлган кимёвий моддалар зарарли микробларни ўлдиришга ёрдам беради, аммо улар нафас олиш йўллари учун хавфли бўлиши мумкин.
Американинг ўпка касалликлари ассоциацияси маълумотларига кўра, кимёвий тозаловчи воситалар хона ҳароратида буғланиб кетадиган хавфли моддаларни, жумладан заҳарли ва аллергия қўзғатувчи органик бирикмаларни чиқаради. Улар кўзларнинг қичиши, йўталиш, аксириш ва бош оғриғига сабаб бўлади. Шу сабабли уйларни тозалаш вақтида эшик ва деразалар очиқ туриши лозим.
Қуруқ мато билан чанг артиш
Қуруқ мато ёки сочиқ аслида чангдан тозалайди, балки уни ҳар ерга тарқатиб юборади. Чангни тозалаш учун нам сочиқ ёки микрофибра матосидан фойдаланган маъқул. Микрофибрани қуруқ ҳолда ишлатилиши мумкин, чунки бу материал чангни ушлаб қоладиган хусусиятга эга.
Изоҳ (0)