Юлдуз Ражабова — асл санъат учун ижод қиладиган саноқли ёш актрисалардан бири ҳисобланади. Шу боисдан ҳам у билан нафақат ўзбек, балки хорижлик режиссёрлар ҳам ҳамкорлик қилишни исташади. Бу йил 35 ёшни қаршилайдиган актрисанинг муваффақият сири нимада? Актрисанинг моддий қийинчиликларга учрагани, бир неча уринишдан сўнг институтга қабул қилингани ва шахсий муносабатлари ҳақида батафсил маълумот берамиз.
“Икки йил институтга киролмаганман”
Юлдуз Ражабова 1989 йилнинг 23 декабрида Навоий шаҳрида туғилган. Онаси уй бекаси, отаси эса журналист бўлиб, актрисанинг бир акаси бор. Юлдуз болалигида санъатга қизиқиши боис Навоий шаҳридаги Фарҳод номли маданият саройидаги рақс тўгарагига қатнашган. Ўрта мактабни тамомлагач, таржимон бўлиш ниятида чет тилларини ўрганишни бошлаган.
— Болаликдан рақс санъатига қизиққанман, аммо таржимон бўлиш хоҳиши устунлик қилган. Инглиз тилини ўрганишга жиддий киришганман, аммо икки йил Жаҳон тиллари университетига ҳужжат топшириб киролмаганман. Учинчи йил Ўзбекистон давлат санъат ва маданият институтига ҳужжат топшириш фикри туғилган. Албатта, қаршиликлар бўлган, аммо онам ҳамиша қўллаб-қувватлаб, имтиҳонларга ўзи олиб келган. Ҳар қандай инсон қўллаб-қувватлайдиган одамга муҳтожлик сезади. Бирор ишни қилишда иккиланиб турсангиз, ўша инсоннинг ишончи катта куч беради. Актриса бўлишимга онамнинг ишончи юқори бўлган. Ҳозир инглиз тилини биламан ва ўрганишда давом этяпман, дейди актриса.
Юлдуз Ражабова ўзбек тилидан ташқари рус, турк, инглиз тилларида ҳам эркин сўзлаша олади.
“Қўшиқчиликка иштиёқим баланд”
Юлдуз Ражабованинг яхши қўшиқ айта олишини кўпчилик мухлислари билади. Актриса бундан бир неча йил аввал Максим Фадеевнинг “Ойналардаги рақслар” қўшиғини ижро этиб, Instagramъдаги саҳифасига жойлаштирган ҳамда мухлисларининг таҳсинига сазовор бўлган эди. Хонанда интервьюларидан бирида реп куйлашга қизиқишини айтиб ўтган.
— Реп йўналишидаги қўшиқни айтишга қизиқаман. Болаликдан қўшиқчиликка иштиёқим баланд бўлган. Лекин айнан соф реп йўналишида қўшиқ айтишни орзу қиламан, деганди актриса.
“Оёққа туришимиз қийин бўлди”
Актриса интервьюларидан бирида болалигида онаси билан бўлган аянчли воқеа ҳақида сўзлаб берган.
— Онам бозорда китоб сотарди. Мен ҳам мактабдан сўнг онамнинг ёнига бориб, унга ёрдам берардим. Китобларни биргаликда сотардик. Бир кун бозорга текширувчилар келди. Бизда рухсатнома бор эди, бироқ унинг амал қилиш муддати бир оз ўтганди. Тошкентдан келган текширувчилар қўлимизда нима бўлса, ҳаммасини тортиб олишди. Китоб, дафтар, қалам, ручка — ҳаммасидан айрилдик. Ўша куни онамнинг юз ифодасини, нималар ҳис этганини жуда яхши хотирлайман. Бир фарзанд ўлароқ онангга ёрдам бера олмаслик жуда ҳам оғир. Бу кун ҳеч қачон эсимдан чиқмайди. Биз у инсонларга ялиндик, ёлвордик, аммо ҳеч қандай натижа бўлмади. Ундан сўнг оёққа туришимиз жуда қийин бўлди. Онам катта қарз кўтариб, ишини нолдан бошлади. Қарзларни секин-аста узиб, оёққа турдик, дея хотирлайди Юлдуз Ражабова.
“Сухарик еб кунимиз ўтарди”
Кейинчалик Ўзбекистон давлат санъат ва маданият институтида таҳсил олган. Юлдуз ўз ижодий фаолиятини шу олийгоҳ қошидаги театрда бошлаган. Кейинчалик видеоклиплардаги иштироки билан танила бошлаган.
— Институтда ўқиган пайтларимда пул масаласида қийналганман. Тўртта курсдошим билан нонни олиб, кесиб “сухарик” қилардик — бутун кун давомида шуни еб юрар эдик. Стипендия олиш учун ижтимоий фанлардан ҳам яхши баҳога ўқиганман. Стипендияни олишим билан турадиган уйимизнинг ижара ҳаққини берардим. Инсон ўзини ўзи эплай олади, лекин оиласи билан бўлса қайсидир нарсалардан воз кечиб, пул ишлашига тўғри келади, дейди актриса.
“Бунда муҳаббат бор”
Актриса ўзбек ва турк ижодкорлари томонидан суратга олинган “Мендирман Жалолиддин” сериалида асосий роллардан бирини ижро этган. Актриса сериал борасидаги танқидларга қуйидагича фикр билдирганди.
— “Мендирман Жалолиддин” сериали ҳақида бошидан салбий изоҳ берила бошланди. Фикрлар фақат салбий бўлди. Мен Озодбек аканинг фикрларини тушундим, бу сериал фақат биз учун эмас, тарихимизни чет элга сотиш учун биздаги жаҳон стандартларига мос бўлган актёр-актрисаларни кўрсатиш, жаҳон стандартларига мос бўлган лойиҳа яратиш учун қилинди. Бир ҳафтада сериалнинг битта қисми намойиш этилди. Бошқа мамлакатларда ҳам сериалларнинг битта қисми ҳафтада бир марта чиқади.
Биз ҳам бутун дунёга мослаб шу нарсани қўллаб кўрдик. Кунлик сериал олиш жуда ҳам қийин. Туркияда, Қозоғистонда ёки бошқа мамлакатларда сериалларнинг бир қисми ҳафтада бир маротаба бериб борилади. Бир ҳафтада биринчи, иккинчи ҳафтада иккинчи ва учинчи ҳафтада учинчи қисмини тақдим этишади, сифат ҳам шунга яраша бўлади.
Бир кунда 35 та эпизод суратга олинса, сериал сифатсиз бўлиб қолади. Сериални томоша қилиш ёки қилмаслик ҳар кимнинг иши. Биз унга жонимизни бериб ишладик. Яхши нарса чиқди, жуда ҳам катта меҳнат бор бўлган лойиҳа бўлди. Сериалда жуда катта муҳаббат бор.
Юлдуз ва Эмре севгиси…
Юлдуз Ражабова “Мендирман Жалолиддин” сериалининг суратга олиш жараёнларида турк актёри Эмре Кивилжим билан танишди. Эмре сериалда Жалолиддинни, Юлдуз эса Жалолиддиннинг севгилиси Қутлибекани ижро этди. Бора-бора актёрларнинг экрандаги севгиси ҳаётга ҳам кўчди. Юлдуз ва Эмренинг бир-бирга бефарқ эмаслиги “Мендирман Жалолиддин”нинг Тошкентдаги тақдимотида сезилди.
Орадан бир оз вақт ўтгач, Эмре Instagram саҳифаси орқали Юлдузни туғилган куни билан табриклади ҳамда “Туғилган кунинг билан, севгилим” деб ёзди. Шундан сўнг Юлдуз ва Эмре ўртасидаги муҳаббат мухлисларга ошкор бўлди. Улар бир неча бор чет эл саёҳатларида ҳам биргаликда кўриниш берди.
Орадан икки йил ўтиб, Эмре Кивилжим “Видо мактуби” деб номланган сериалда суратга тушди. Шундан сўнг Эмренинг сериалдаги партнёри Робия Сойтуркка кўнгил қўйгани ҳақида миш-мишлар тарқалди. Бироқ Эмре журналист Жасур Ҳамроевга берган интервьюсида Юлдузга бўлган ҳислари ҳақиқий эканини таъкидлади.
“Юлдуз билан ҳали ҳам гаплашамиз, кўришиб турамиз. Муносабатларимиз ҳаммаси яхши. Севгимиз битмас, у мозорга қадар. Юлдузни ҳалиям юрагимдан севаман”, деди Эмре.
“Бу тузаладиган касаллик эмас”
Юлдуз интервьюларидан бирида бир неча йилдан буён бош оғриқларидан азият чекиши ҳақида гапирган.
— Жуда кўп йиллардан бери мени бош оғриқлар қийнаб келади, бу мигрен билан боғлиқ. Айнан шу касаллиги бор инсонлар мени яхши тушунади. Бу бош оғриқ билан ҳеч нарса қила олмайсиз. Баъзида шундай оғрийди, ҳеч қандай дори ёрдам бермайди. Мигренни даволаш қийин. Мен бир нечта шифокорлар билан маслаҳатлашиб, бу тузаладиган касаллик эмас, деган фикрга келдим. Оғриқни қандайдир усуллар билан камайтириш ёки ҳар олти ойда уколини олиш мумкин. Ҳозирда шулардан фойдаланяпман, дейди актриса.
“Дўстсиз қоламан деб ўйламагандим”
— Биринчи навбатда инсон шахсий ҳаёти ҳақида гапиришга тайёр бўлиши керак. Инсон шахсий ҳаёти ҳақида янги ҳаётга қадам қўяётганда, ўзига ишонч ҳосил қилгандан кейин айтиши керак деб ўйлайман.
Ҳаётдаги танловлар борасида ўзим ишонган 3-4 кишидан маслаҳат оламан. Бир вақтлар атрофимда дўстларим бор эди, аммо вақт ўтиб битта ўзим қолиб кетган пайтлар ҳам бўлди. Бу борада ҳеч кимни айбдор қилмоқчи эмасман, лекин Аллоҳ синов берганда олдимизда ким қолишини ва қолмаслигини кўрсатиб берар экан. Ҳеч қачон дўстсиз бир ўзим қолиб кетаман, деб ўйламаганман. Яхши ҳам шунақа бўлди, шундан кейин ўзимни эшитишни бошладим.
Ўша пайтда атрофимда қолган 3-4 кишининг фикри меники билан ҳамоҳанг эканини тушуниб етдим. Бугунги кунда дўст танламайман, атрофимда ўзим ишонган яқинларим бор. Ўртоқларим бўлиши мумкин, лекин мен уларни ўзим ишонган тўрт инсон даражасига қўймайман. Чунки ҳаётда нима бўлишидан қатъи назар, оила аъзоларингиздан ташқари бошқа ҳеч кимга сизнинг соғлиғингиз ҳам, омадли ва тўғри бўлганингиз ҳам керак эмас, дейди актриса.
“Оғир аҳволда эдим”
Актриса Юлдуз Ражабова бошловчи журналист Турсуной Алимовага берган интервьюсида қалб кечинмалари билан ўртоқлашди.
— Сўнгги уч-тўрт йил ичида мен эмас, балки ижтимоий тармоқларда ҳаётим ҳақида кўпроқ биладиган инсонлар бордек туюлди. У пайтда жуда оғир аҳволда эдим. Шу нарсани тушуниб етдимки, агар қиз бола туғилганиданоқ отаси ёки акаси унга севги қандай бўлиши кераклигини кўрсатмаса ёки меҳр бермаса, аёл севги қандай бўлишини билмайди.
Меҳр кўрмаган қиз эртами-кечми келин бўлганида, эҳтимол турмуш ўртоғи унга қўл кўтарса, буни нормал ҳолат деб ўйлайди. Аёл кишининг ҳаёти болаликдаги меҳрга қанчалик боғлиқ эканини тушуняпсизми? Ҳозир мени хафа қилган нарсалар билан яна бир бор юзлашяпман ва такрор оғриқларни ҳис қиляпман. Мени “Нимага ўшанда ўзимни ҳимоя қила олмадим?” деган савол қийнамоқда, дейди актриса.
Юлдуз Ражабова қандай хатолар кечирилмаслиги ҳақида гапирди.
— Назаримда кечирилмайдиган хатолардан бири — бир инсоннинг ҳаётини, турмуш тарзини, тарбиясини ёки фикрларини ўзига мос қилиб ўзгартириш ҳаракатидир, деб ўйлайман. Мисол учун, сизнинг бошингиздан ўтган нарсани мен ҳис қилолмайман. Мен фақат эшитишим ва уни сал бўлса ҳам ҳис қилиб кўришга ҳаракат қилишим мумкин. Лекин мен агар хоҳишим билан сизни ўзгартирмоқчи бўлсам, бу бир инсоннинг ҳаётига рухсатсиз кириш бўлади.Тасаввур қилинг, сиз бир инсон учун ўзлигингиздан воз кечяпсиз. Агар ўша инсонга керак бўлмай қолсангиз нима бўлади?
Мен инсонларнинг кўнглини олиш учун ўзимни йўқотиб қўйганимни ҳис қилдим. Бу менга ҳаловат бермади. Улар билан жисмонан яқин эдим, бироқ қалблар орасидаги масофа машриқ билан мағриб оралиғигача эди, дейди Юлдуз Ражабова.
Президент эътирофи
Юлдуз Ражабова 2021 йилда Халқаро хотин-қизлар куни арафасида президент фармони билан “Шуҳрат” медали билан тақдирланди. Актриса давлат раҳбари билан учрашув ҳақида интервьюларидан бирида катта ҳаяжон билан сўзлаб берган. Ўшанда 8 март байрами муносабати билан ўтказилган тантанали маросимда Ўзбекистон Президенти Шавкат Мирзиёев актриса Юлдуз Ражабова иштирокидаги “Мендирман Жалолиддин” сериалини эътироф этиб, уни ижодни сусайтирмасликка чақирган эди.
— 8 март—Халқаро хотин-қизлар куни муносабати билан ўтказилган маросимда давлатимиз раҳбари ўша тадбирда қатнашган барча аёлларни табриклаб, бирма-бир сўрашиб чиқди. Уларнинг бундай олийжаноблигини кўриб, айрим аёллар хурсандлигидан йиғлаб ҳам юборди.
Президентимизнинг маросимдаги хотин-қизлар билан сўрашишларини сира кутмагандим. Мен билан сўрашаётган вақтда “Кино зўр чиқди, ижодни сусайтирман”, дея айтган эътирофи жуда ҳаяжонлантирди ва ўзимга нисбатан ишончни кучайтирди. Шунингдек, бундай эътибор ўз устимда янада қаттиқ ишлашимга бир туртки бўлди, масъулиятни оширди.
Дарвоқе, актриса фаолиятини 2013 йилда Саид Мухторовнинг “Хазон” номли қисқа метражли фильмида суратга тушиш билан бошлаган. У фаолияти давомида “Турист” (2013), “Сотқин” (2016), “Юрагимдасан” (2018), “Ойқиз эртаги”, “Мақсад” (2018) “Скорпион”(2018), “Ёлғон гирдоби” (2018) каби фильмлар ва “Мендирман Жалолиддин” номли сериалда суратга тушди. Юлдуз айни дамда “Дийдор” театр студиясида фаолият юритади. Актриса Оскар мукофотига тавсия этилган “Фариданинг икки минг қўшиғи” фильмида ҳам бош ролни ижро этган. Актриса ҳозирча оила қургани йўқ.
Изоҳ (0)