Пигмент доғлар ташқи кўринишга таъсир қиладиган нохуш муаммо бўлиб, уларнинг юз ва тана терисида пайдо бўлиши баъзан организмдаги жиддий носозликларни кўрсатади. Аммо кўпинча бу соғлиқ учун хавф туғдирмайдиган одатий эстетик нуқсондир.
Танада жигарранг доғлар пайдо бўлишининг сабаблари ҳар хил. Бунга генетик мойиллик, турли касалликлар, жумладан хавфли ўсимталар сабаб бўлиши мумкин. Шунингдек, инсон организми вақт ўтиши билан чарчайди, токсинлар буйрак, жигар, ўпка ва ичаклар томонидан тўлиқ чиқариб юборилмайди. Детоксификация функциялари тери томонидан амалга оширилгани туфайли қатор омиллар таъсирида гиперпигментация пайдо бўлади.
Шу сабабли танада бундай доғлар нима учун пайдо бўлганлигини билиш учун шифокор кўригидан ўтиш ва керакли даволаниш чораларини кўриш лозим.
Терида жигарранг доғлар қандай пайдо бўлади?
Терининг юқори қатламида меланинни синтез қиладиган махсус ҳужайралар — меланоцитлар мавжуд. Айнан шу пигмент туфайли тери ултрабинафша нурланишидан ҳимояланади. Агар бирор сабабга кўра меланин ишлаб чиқариш механизми бузилса, ушбу пигмент меъёрдан ортиқ ишлаб чиқарилади ва юзда доғ пайдо қилади.
Ушбу ҳодиса фанда гиперпигментация деб аталади. Қуёш таъсиридаги пигментация кўпинча юз, бўйин, елка ва қўл терисида пайдо бўлади. Пигмент доғлари оғриқсиз бўлиб, улар терининг сиртидан кўтарилмайди ва тери тузилишини ўзгартирмайди.
Агар ота-онангизнинг терисида бундай доғлар кўп бўлса, сизда ҳам гиперпигментация пайдо бўлиш эҳтимоли юқори. Кўпинча бундай ҳолат кекса одамларда кўпроқ учрайди ва ёшга боғлиқ табиий ўзгаришлар ҳисобланади.
Бундан ташқари, ҳомиладор аёлларнинг терисида ҳам шундай доғлар пайдо бўлиши мумкин. Улар аксарият ҳолларда фарзанд дунёга келгандан кейин тезда йўқолади.
Афсуски, гиперпигментациянинг жиддийроқ сабаблари ҳам бор. Жигарранг доғларнинг пайдо бўлиши ошқозон-ичак тракти ва метаболизм билан боғлиқ хасталик ёки саратон (меланома) каби жиддий касалликнинг аломати бўлиши мумкин.
Тўқ рангли доғлар пайдо бўлганда нима қилиш лозим?
Бундай ҳолатда дерматологга мурожаат қилиш, сўнг шифокор кўрсатмаси билан бошқа тор соҳа шифокорларидан тиббий маслаҳат олиш ҳамда зарур анализларни топшириш керак. Тиббий текширувдан ўтиш сизда хавфли касалликлар йўқ эканлигини аниқлашга ёрдам беради. Асосийси, бундай доғлардан уй шароитида, танишлар тавсияси билан мустақил халос бўлишга уринманг. Агар асосий касаллик назорат остига олинса, бу тери ҳолатининг яхшиланишига олиб келиши мумкин.
Изоҳ (0)