Уй ва иш жойларини тоза сақлаш нафақат эстетик жиҳатдан муҳим, балки соғлиқ учун ҳам катта аҳамиятга эга. Чанг, аллергенлар ва кир уй муҳитини ифлослантириб, турли касалликларга сабаб бўлади. Шу сабабли тозалаш жараёнини осонлаштирувчи ва самарали воситалардан бири — чангютгич бугунги кунда деярли ҳар бир уйда ишлатилади. Аммо шундай юмушлар борки, уларни чангютгич ёрдамида бажариш техниканинг бузилишига олиб келади.
Чангютгич орқали нималарни тозалаш мумкин эмас?
Шиша синиқлари
Ушбу пункт бежизга биринчи ўринга қўйилмади. Агар қуйидаги рўйхатдан ҳеч бўлмаса биттаси ёдингизда қолса, у ҳам бўлса шиша ва ойна синиқлари бўлиши лозим. Чангютгичда уларни тозаласак, шланг йиртилиши, майда бўлаклар эса қопни тешиши мумкин. Шунингдек, шиша синиқлари мотор ичига тушса, чангютгич тез орада яроқсиз ҳолатга келади.
Ерга тўкилган сув
Бундай ҳолда “ҳаммомда сочларни фенда қуритмаслик лозим” қоидаси қўлланилади: ҳеч қачон электр жиҳозларига сув тегмаслиги лозим (айнан нам тозалаш учун мўлжалланган гаджетлар бундан мустасно).
Нам гилам
Чангютгичда нам гилам устини тозалашдан аввал уни яхшилаб қуришига аҳамият беринг. Гиламдаги сув томчилари техникани ишдан чиқармайди, лекин унинг ичида намлик тўпланишига, моғорлашишига, у ерда эса чанг ва сочлар ёпишишига сабаб бўлади. Натижада чангютгич яхши тортмай қўяди.
Порошок ёки сода кукуни
Эҳтимол, интернетда ушбу лайфҳакни кўрган бўлсангиз керак: баъзилар гилам устига сода ёки порошок сепиб, сўнг устидан чангютгич билан юришни тавсия қилади. Шу орқали гилам дезинфекция бўлади, деб уқтирилади. Аммо бу тавсияни амалда синаб кўриб, чангютгичсиз қолиб кетишингиз мумкин — катта миқдордаги порошок ва истеъмол содаси бир зумда қурилма филтрларига тиқилиб қолади ва техникани ишдан чиқаради.
Пудра ва кўз тенлари
Ерга тушиб кетиб, синган косметикани нам супурги билан тозалаш лозим, акс ҳолда кўз тенининг ранги барча ерга суркалиб, ерда доғлар қолдиради.
Кул ва кўмир
Агар уй шароитида калян ишлатилгач, кўмирни чангютгичда тозаламоқчи бўлсангиз, адашасиз. Кўмирнинг юқори ҳарорати чанг тўпланадиган қопчани ёндириб юбориши ва ёнғинга олиб келиши мумкин.
Қурилиш материалларидан қолган чанг
Уйни таъмирдан ўтказиш вақтида жуда катта миқдорда чанг тўпланади. Аммо уни фақатгина супурги ёрдамида тозалаш мумкин, акс ҳолда қурилиш материаллари техникани ишдан чиқаради. Бунга сабаб — қурилиш материалларидаги кичик зарралар қопча ва филтр ичида тўпланиб қолишида.
Катта миқдордаги соч ёки мўйна
Чангютгичлар гиламга тушган соч ва мўйнани йиғиш учун мўлжалланган бўлади, аммо катта миқдордаги соч филтр ва чўткаларда тўпланиб қолиши мумкин.
Изоҳ (0)