Америка ва Литва муҳандислари Литвадаги машғулотлар пайтида беш кун олдин йўқолган АҚШ армиясининг тўрт ҳарбий хизматчиларини топиш мақсадида ботқоқли ҳудудни қуритиш бўйича ишлар олиб бормоқда.
Уларнинг зирҳли транспортёри чоршанба куни тахминан беш метр чуқурликда топилди. Қутқарувчилар ҳали унинг ичига кира олмади ва транспорт воситасини чиқариб ололмади.
Яқинда АҚШ Қуролли Кучлари Литвага сувни тортиб олиш учун қўшимча ускуналар юборилгани ҳақида маълум қилди. Ҳарбийлар йўқолган жойда — Пабраде полигонида катта қувватли кран ва насослар ишлатилмоқда. Бунинг учун 30 тонна шағал келтирилди.
Мутахассисларнинг огоҳлантиришича, операция анча вақт талаб этади.
Шанба куни шўнғишга уриниш бўлган, аммо зич лой қатлами қутқарувчиларга чўккан М88 Ҳерcулесъга етиб боришга имкон бермаган. Аскарларнинг жасадлари ҳам топилмаган.
Польша ёрдам сифатида муҳандислар ва махсус ускуналар, шунингдек, аллақачон жойида ишлаб турган АҚШ Ҳарбий-денгиз кучлари ғаввослар жамоасини қўллаб-қувватлаш учун 150 нафар шахсий таркибни юбормоқда.
Вильнюсдаги бош ибодатхонада бедарак йўқолганлар шарафига ибодат маросими ўтказилди. Уларнинг номлари ошкор қилинмаяпти. Фақат уларнинг 3-пиёда дивизиясининг 1-бригадаси ҳарбий хизматчилари эканлиги маълум.
Европа ва Африкадаги Америка қўмондонлигининг хабар беришича, ҳарбий полигондаги ботқоқликда йўқолган зирҳли транспортёрда уч нафар бедарак кетган америкалик аскарнинг жасади топилган. Тўртинчи ҳарбий хизматчи ҳамон қидирилмоқда.
Изоҳ (0)