АҚШ президенти Дональд Трамп 6 март куни Ҳукумат самарадорлиги департаменти (DOGE) раҳбари Илон Маскнинг фаолиятига янги чекловлар қўйди. Бу ҳақда Politico хабар берди.
DOGE раҳбари бунга жавобан бошқарувда айрим хатоларга йўл қўйганини тан олди. Икки нафар вакилнинг айтишича, Трамп ўз маъмуриятининг юқори лавозимдаги аъзоларига Маск фақат тавсиялар бериш ҳуқуқига эгалигини айтган. Аммо унинг кадрлар ва сиёсат масалада якка тартибда қарорлар қабул қилиш ҳуқуқи йўқлигини таъкидлаган.
Бу Трампнинг Маск ваколатларини чеклаш йўлидаги биринчи жиддий қадами ҳисобланади. Президентнинг янги кўрсатмаларига кўра, Маск ва унинг ходимлари маслаҳатчи вазифасини бажаради. Аммо кадрлар, сиёсат ва амалга ошириш суръатлари бўйича якуний қарорларни Вазирлар Маҳкамаси аъзолари қабул қилиши лозим.
Миллиардер бу борада президентнинг баёнотига қўшилиб, айрим хатоларга йўл қўйганини тан олди. Ушбу хатолар оммавий ишдан бўшатишлар ва давлат хизматчиларига таҳдидлар билан боғлиқ.
Трампнинг айтишича, у ҳукуматда профессионал мутахассисларни сақлаб қолишни ва қобилиятли федерал ишчиларни оммавий равишда ҳайдамасликни хоҳлайди. Аммо унинг маъмурияти сўнгги ҳафталарда ўн минглаб федерал ходимларни ишдан бўшатди. Президентнинг янги қарори бўшатилган ишчиларнинг қайта ишга олинишига олиб келадими ёки йўқми, аниқ эмас.
Котибалар турли бўлимларда ишлайдиган одамларни ўрганиб, тушуниб борар экан, кимни қолдириш ва кетқазишни жуда аниқ билади. Илон ва бошқа буюк инсонлар эса тарихий даражадаги ишларни амалга ошириси мумкин, дея изоҳ берди Трамп.
Президент жамоаси томонидан бюджетни тежаш мақсадида ҳукумат агентликлари ходимларининг оммавий қисқартирилиши Марказий разведка бошқармаси ва Мудофаа вазирлигига ҳам таъсир кўрсатди. Пентагоннинг таъкидлашича, синов муддатида бўлган ва ўз лавозимида бир йил ёки ундан кам ишлаган беш мингдан ортиқ ходим ишдан бўшатилиши мумкин. Марказий разведка бошқармаси аллақачон инклюзивлик сиёсати (DEI) билан боғлиқ бўлган 20 дан ортиқ ходимларни ишдан олган.
Ишдан бўшатиш тўлқини бутун мамлакат бўйлаб давом этмоқда. Аввалроқ Associated Press юз минглаб одамлар ишсиз қолиши мумкинлиги, айниқса, бу 1-2 йилдан кам ишлаган ва синов муддатида бўлганларга тегишли экани ҳақида хабар берган эди. Ишдан бўшатиш тўғрисидаги хатлар, хусусан, электрон почта орқали юборилади.
2025 йил февраль ойида Трамп маъмурияти ядровий хавфсизлик бошқармасининг 400 нафаргача ходимини тасодифан ишдан бўшатгани маълум бўлганди. Улар орасида ядро қуроли ишлаб чиқариш объектларида ишлаган, пудратчиларни назорат қилган ва қуролларни текширган мутахассислар ҳам бор. Энди уларни шошилинч равишда қайтаришга уринишмоқда.
Изоҳ (0)