Венгрия ташқи ишлар вазири Петер Сийярто Россиянинг “РИА Новости” ахборот агентлигига берган интервьюсида Будапешт Украина томонидан Россия энергия инфратузилмаларига зарбаларни мамлакат суверенитетига ҳужум сифатида баҳолашини айтди.
Энергетик хавфсизлик — бу суверенитет масаласи ва биз энергетик инфратузилмамизга қилинган ҳар қандай ҳужумни суверенитетимизга ҳужум сифатида қабул қиламиз. Шунинг учун биз бундай ҳужумларнинг барчасини рад этамиз, деди Сийярто.
Унинг қўшимча қилишича, муаммо сўнгги ойларда Украина томонидан “Дружба” нефть қувури ва унинг боғловчи инфратузилмасига қилинган ҳужумлар бўлган. Украина амалга оширган зарбалар натижасида Венгрияда бир неча кун давомида нефть етказиб беришда узилишлар юзага келган.
Маълумот ўрнида, 18 март куни АҚШ президенти Дональд Трамп ва Россия президенти Владимир Путин ўртасида Украина уруши бўйича муҳим телефон мулоқоти бўлиб ўтган эди. Суҳбат якунида етакчилар Россиянинг Украина энергетика инфратузилмасига ҳужумларини 30 кунга тўхтатишга келишиб олганди.
Кремль тарқатган маълумотларга кўра, Россия президенти Владимир Путин АҚШ президенти Дональд Трампнинг Россия ва Украина бир-бирининг энергетика инфратузилмасига ҳужумларини 30 кунга тўхтатиши ҳақидаги таклифига рози бўлган ва россиялик ҳарбийларга уларни тўхтатишни буюрган.
“Дарё” бу келишув ҳақида таҳлилий мақола эълон қилган. Уни бу ерда ўқишингиз мумкин.
Изоҳ (0)