Хонанда Жасур Умиров ўзбек эстрадасидаги энг кўп муҳокама қилинадиган ижодкор. Бироқ ҳозирда у анча улғайган. Сабаби эндиликда Жасур оила бошлиғи ҳамда ўғли учун масъулиятни ҳис этадиган ота.
Жасур Умиров 1986 йилнинг 31-март санасида Самарқанд вилояти Каттақўрғон шаҳрида муваффақиятли тадбиркор ва уй бекаси оиласида таваллуд топган. Кўпчилик Жасур отасининг изидан бориб тадбиркорлик билан шуғулланишини тахмин қилган бўлса-да, у хонандалик йўлини танлади.
Жасур болалиги ҳақида гапирар экан, пул топиш учун тандир ясаб сотган пайтларини эслайди.
“Болалигимда тандир сотганмиз. Отам тандир ясашни ўргатган. Тандирдан яхши пул қоларди. У кунлар ҳалигача эсимда. Ўйин-кулги билан юриб тандир сотардик. Тирикчиликнинг айби йўқ”, дейди хонанда
Жасур мактабни тамомлаганидан сўнг Ўзбекистон давлат консерваториясининг “Эстрада хонандаси” факультетида таҳсил олган.
У илк ижодини 2009 йилдан бошлайди. Жасур ижросидаги “Биллурам”, “Ойша”, “Дерди-я”, “Жон-жон”, “Дарёлар”, ва “Юрибман-да” қўшиқлари уни мухлисларига танита бошлади. Унинг илк яккахон концерти 2010 йилнинг 21 декабрида “Халқлар дўстлиги” санъат саройида ўтказилди. Хонанда ўз фаолиятини лирик қўшиқлар ёзишдан бошлаган, “Жумагул” қўшиғи унга ҳақиқий машҳурлик келтирди.
Бу қўшиқ болаларга ҳам, катталарга ҳам бирдек ёқди. Санъаткор ушбу қўшиқни чиқаргач, яна бир қўшиғи “Одамларнинг тўйи”ни ҳам тақдим этди. Бу сафар ушбу қўшиқ янада муваффақиятли бўлди ва барча мухлислари томонидан илиқ кутиб олинди.
Илк марта қамоққа тушиши
2018 йилда Жасур Умиров 15 суткага қамалгани ҳақида хабарлар тарқалди. Бунга Жасурнинг маст ҳолда Captiva’сида танишининг хонадонига бориб, унинг дарвозасига бир неча марта машинанинг олд қисми билан ургани сабаб бўлган.
Жасур Умировга нисбатан Маъмурий жавобгарлик тўғрисидаги кодекснинг 183-моддаси (майда безорилик, яъни жамоат жойларида уятли сўзлар билан сўкиниш, фуқароларга ҳақоратомуз шилқимлик қилиш ҳамда жамоат тартибини ва фуқароларнинг осойишталигини бузувчи шу каби бошқа хатти-ҳаракатларда ифодаланган жамиятда юриш-туриш қоидаларини қасддан менсимаслик) билан маъмурий иш очилган.
Судда хонанда айбига тўлиқ иқрор бўлган — ростдан ҳам ёнида олиб юрадиган пичоғи билан танишини қўрқитиб, ҳақоратлаганини тан олган. Сабаб сифатида ўзи ёқтирган Ш. исмли қизни унга турмушга беришмаётганини кўрсатган. Лекин қилган ишидан афсусдалигини билдириб, суддан енгиллик сўраган. Суд Жасур Умировни Маъмурий жавобгарлик тўғрисидаги кодекснинг 183-моддаси бўйича айбдор деб топиб, 15 суткалик маъмурий қамоқ жазосини тайинлаган.
Вояга етмаган қизнинг номусига тегганликда айбланган хонанда
2021 йилда Жасур Умиров яна бир бор қамоқ жазосини олди. Бу сафар у вояга етмаган қизнинг номусига тегганликда айбланди.
2021 йил 2 февраль куни жиноят ишлари бўйича Каттақўрғон шаҳар судида Жасур Умиров ва унинг икки шеригига нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди. Ҳукмга кўра, Жасур Умиров Жиноят кодексининг 118-моддаси (номусга тегиш) 1-қисми билан айбли деб топилиб, унга 5 йил муддатга озодликдан маҳрум қилиш жазоси тайинланди. Унинг икки шериги эса 1,5 йилга озодликдан маҳрум қилинган. Хонанда интервьюларидан бирида ушбу ҳолатга изоҳ берар экан, унга туҳмат қилишганини айтади.
— Менга туҳмат бўлган. Ўша қиз терговчига ҳам, суд залида ҳам айбим йўқлигини айтган, лекин негадир ишонишмаган, у қиз мени севиб қолган экан. Турмушга чиқмоқчи бўлиб, менга туҳмат қилган. Мен айбим бўлмагани учун қамалмайман, деб ўйлардим. Лекин у қизга ҳам кимдир ўргатдими, менга турмушга чиқмоқчи бўлган. Ота-онам у қизга “Сенга уйланади ўғлим, аслида ҳақиқат қандай бўлган, суд залига бориб, ҳақиқатни айтиб бер”, дейишганидан кейин у ҳақиқатни гапириб берган. Лекин барибир қамалиб кетдим. Ота-онам ҳам бошида айбим йўқлигига ишонишмаган. Кейинчалик тушуниб етишган.
Ўз вақтида қизлар стадиондаги панжараларни бузиб чиқиб кетадиган даражада яхши кўрадиган санъаткор бўлганман. Ўзи санъаткорларнинг мухлисалари кўп бўларкан.
“Менинг феъл-атворим шунақа: аёллардан уяламан. Учта аёлнинг орасига кириб қолсам, кўзига қаролмай жим ўтираман. Масалан, синглим жуда бадавлат оилаларнинг қизлари билан бирга ўқиган. Унинг дугоналари уйимизга келиб-кетиб юрган. Биронтаси билан гаплашмаганман ҳаттоки. Юзига ҳам қарамаганман. Қизларга зўравонлик қилиш хаёлимга ҳам келмаган. Чунки атрофимда шундоқ ҳам қизлар кўп бўлган. Мен у қизга уйланмаганман”, деган эди хонанда.
Тезликни оширгани учун қарийб 4000 доллар жарима тўлаган
Хонанда интервьюларидан бирида светофор нима эканлигини билмагани ва йўл қоидаларига бўйсунмагани учун 3800 АҚШ доллари миқдорида жаримага тортилгани ҳақида айтиб ўтган.
“У пайтлари бир кунда 12 тагача тўйга борардик. Бундай пайтда шошмасликнинг иложи йўқ эди. Ҳайдовчи машинани “учирарди”. “Мен-ку, тўйдан 500 АҚШ доллари оламан, сен 50 минг сўм учун ўлиб кетмоқчимисан?” деб ҳазиллашардим. У пайтлари светофор нима эканлигини билмасдик, тезлигимиз ҳам катта бўларди. Бир марта 3800 АҚШ доллари миқдорида жарима келган. Ҳозир тўйлар у қадар кўп эмас. Битта мен эмас, бошқалар ҳам қоидаларга амал қиладиган бўлиб қолишган”, деган эди хонанда.
Муниса Ризаева унга нима сабабдан тарсаки туширган эди?
Жасур Умиров “Алдама мени” кўрсатувига берган интервьюсида синглиси Каримага гап отгани учун Муниса Ризаевадан калтак егани ҳақида айтиб ўтган.
Шахсий ҳаёти
2022 йилнинг 3 декабрь куни пойтахтдаги ресторанлардан бирида хонанда Жасур Умировнинг никоҳ оқшоми бўлиб ўтди. Хонанда ўзидан 14 ёш кичик Гўзал исмли қиз билан оила қурди. Тантанага ўзбек санъатининг кўплаб таниқли вакиллари ташриф буюрди.
Жасур рафиқасини ўзи топгани ҳақида сўзлаб берган.
“Рафиқамни ўзим топганман. У синглимнинг дугонаси эди. Аслида ҳеч кимни зўрламаганимни, менга туҳмат бўлганини батафсил тушунтирганман. Шунда қайнонам рафиқамга ‘бошидан унча-мунча синовлар ўтибди, тобланибди, оила ҳам яхши экан, шунга тегасан’, деган. У мендан 14 ёш кичкина, жуда рашкчи. Агар клипларимда тушган қизлар билан телефон рақам алмашганимни билиб қолса, жанжал кўтаради. Лекин аёл кишининг рашк қилгани ҳам яхши”, деганди хонанда.
Ҳозирда Жасур ва Гўзалнинг Муҳаммад Халид исмли ўғил фарзанди бор.
Лицензияси олиб қўйилишига сабаб бўлган воқеа
Жасур Умиров интервьюларида бир неча йил аввал лицензияси олиб қўйилишига сабаб бўлган воқеа ҳақида ҳам сўзлаб берганди.
— Лицензиямни МХХ ходимининг тўйига бормаганим учун олиб қўйишган эди. Ўшанда “бораман, лекин касал ётибман”, деганман. Кейинроқ яна бир марта қўнғироқ қилишганида администраторим “Пулини берсанглар, чиқаркан”, деган. Шунда “бўлди, Жасур керакмас”, дейишган ва лицензиямни олиб қўйишган. Шундан кейин “запрет”га тушганман. Шунда беш ойга олишган эди лицензиямни. Энди олганимда яна беш ойга олиб қўйишган. Санъаткорнинг лицензиясини олишни нотўғри иш деб биламан. Мана ҳозир энди йўқолиб кетди бунақа нарсалар. Озодбек Назарбеков вазир бўлганидан кейин санъаткорлар тадбирга чиқсаям пул тўланадиган бўлди, дейди Жасур Умиров.
Изоҳ (0)