Украиналик муҳандислар денгиз, қуруқлик ва ҳаводаги нишонларни йўқ қилишга қодир “Катран” дронини намойиш қилди. Бу ҳақда рақамли трансформация вазири Михаил Федоров хабар берди.
Мазкур дрон бошқаларига қараганда анча кенг имкониятларга эга. Унинг иштирокидаги миссиялар ҳақидаги маълумотлар махфийлаштирилган. Дрон торпеда, миниган, пулемёт, кўчма зенит-ракета комплекси ва бошқа қуроллар билан жиҳозланган. У 1000 километрдан ортиқ масофани “хотиржам босиб ўта олади”, зарбалар беради ва разведка миссияларини бажаради.
“Катран” учун алоҳида радиоэлектрон кураш тизими керак эмас, чунки у таҳдидларни автоматик аниқлаш ва чалғитувчи тузоқларни ишга тушириш тизими билан жиҳозланган. Бу — уруш олиб боришда янги стандартни белгиловчи супертехнология, деди Федоров.
2024 йил Украина президенти Владимир Зеленский армия урушда 700 километргача учадиган янги “Пекло” дронини қўллаганини айтганди. Ракета соатига 700 километр тезликка эришади, максимал парвоз масофаси 700 км билан чекланган. “Пекло”нинг 70 фоизи давлат ва хусусий компаниялар томонидан ишлаб чиқариладиган маҳаллий компонентлардан иборат.
Изоҳ (0)