Россия президенти Владимир Путин Украинада сайловлар ўтказиш учун БМТ ва бир қатор давлатлар шафелигида “вақтинчалик бошқарув” жорий этишни таклиф этди. Бу ҳақда “РБК” хабар берди
Таклиф Украинанинг уч йилдан ортиқ вақт давомида Россия ҳарбий босқинига қарши курашаётган бир пайтда илгари сурилди.
Аслида, БМТ, АҚШ, Европа давлатлари, албатта, ҳамкорларимиз ва дўстларимиз иштирокида Украинада вақтинчалик бошқарувни жорий этиш имкониятини муҳокама қилиш мумкин эди. Бу демократик сайловлар ўтказиш, халқ ишончига эга бўлган самарали ҳукуматни шакллантириш ва кейинчалик улар билан тинчлик шартномаси бўйича музокараларни бошлаш учун зарур, деган Путин.
Унинг фикрича, бу орқали Украина ҳукумати билан “бутун дунёда тан олинадиган ва ишончли бўлган қонуний ҳужжатларни” имзолаш мумкин.
Бу вариантлардан бири холос, бошқа вариантлар йўқ, деган фикрда эмасман. Лекин бу муҳокама қилинаётганлардан бири бўлиб, БМТ амалиётида бундай тажриба мавжуд, деган Кремль раҳбари.
У “БМТнинг тинчликпарварлик фаолияти доирасида ташқи бошқарув, муваққат маъмурият деб аталадиган усул аллақачон бир неча бор қўлланилган” мамлакатларга мисол сифатида Шарқий Тимор, Папуа-Янги Гвинея ва собиқ Югославиянинг айрим ҳудудларини келтирди.
Россия ҳозир ким билан келишув имзолашини билмаяпти, чунки эртага бошқа раҳбарлар келиши мумкин, дея даъво қилди у.
Путин бир неча бор украиналик ҳамкасби Владимир Зеленскийни Украинанинг қонуний президенти деб ҳисобламаслигини, чунки 2024 йилда президентлик сайлови ўтказилмаганини айтганди. Ўз навбатида, Украина қонунчилиги ҳарбий ҳолат амал қилаётган пайтда ҳар қандай сайловларни ўтказишни тақиқлайди. Зеленскийнинг ўзи НАТОга аъзолик эвазига президентликдан кетишга рози эканини қайд этган. АҚШ Миллий хавфсизлик кенгашининг расмий вакили Украинада бошқарув унинг конституцияси ва мамлакат халқи томонидан белгиланишини таъкидлаган.
Изоҳ (0)