Россия Қора ва Болтиқ денгизлари устидаги халқаро сувларда патрул қилаётган француз ҳарбий самолётларини қасддан нишонга олганликда айбланмоқда.
Франция унинг самолётларига Россия атайлаб ҳаво ҳужумидан мудофаа тизимларини қаратганини маълум қилди. Франция мудофаа вазири Себастьян Лекорню тизим Қора денгиздаги француз самолётини нишонга олганини айтди. Қуролли кучлар полковниги Жан-Пьер Годиле бунга аниқлик киритиб, воқеа 2024 йил ноябрь ойида юз берганини маълум қилди.
Радиоалоқа пайтида россияликлар бизга таҳдид қилди. Мулоқот жуда тажовузкор тарзда ўтди. Бундай ҳолат илгари ҳеч қачон кузатилмаган, деди Годиле.
AFP’нинг ишончли манбаларига кўра, Россия томони очиқчасига француз самолётини “йўқ қилиши”ни айтган. Худди шундай воқеа 19 март куни Франция ҳарбий-денгиз кучларининг Baltic Watch операциясида иштирок этаётган Атлантиқуэ 2 патрул самолёти билан содир бўлган. Самолёт Болтиқ денгизи устидаги халқаро ҳаво ҳудудида парвоз қилган.
У Россиянинг ҳаракатларига қарамай, йўналишини ўзгартирмаган ва таҳдидларга эътибор бермаган ҳолда Болтиқ денгизининг сувости инфратузилмасини кузатиш вазифасини бажаришда давом этган.
Франция қуролли кучлари бош штаби тушунтиришича, Россия оддий кузатув тизимларидан фарқланадиган ўт очишни бошқариш радаридан фойдаланмоқда. Оддий радарлар ҳаво бўшлиғини пассив равишда кузаца, ўт очишни бошқариш радари нишонни фаол равишда кузатиб, эҳтимолий зарба учун қурол тизимига аниқ маълумотларни узатади.
Бундай мақсадли нишонга олиш душманлик ниятидан далолат беради, чунки бу ракетани учиришдан олдинги сўнгги босқичдир, дея таъкидлади Бош штаб.
Бу француз самолётлари нишонга олинганига оид ягона ҳодиса эмас
4 март куни Франция ҳарбий-ҳаво кучлари ва космик кучларининг MQ-9А Reaper дрони Россиянинг Су-35 қирувчи самолётининг Ўрта ер денгизининг шарқий қисмида тажовузкор манёврларига дуч келди. Ўшанда Лекорню Россия томонининг ҳаракатларини “атайлаб қилинган, нопрофессионал ва тажовузкор” деб атаган. У Франция халқаро ҳудудларда ўз миссияларини бажаришдан бош тортмоқчи эмаслигини таъкидлаган.
Январь ойида Франциянинг Атлантиқуэ 2 самолёти Калининградда жойлашган С-400 тизими томонидан нишонга олинган эди. Воқеа НАТО миссияси доирасида халқаро сувлар мониторинги олиб борилаётган пайтда содир бўлган.
Лекорнюнинг айтишича, Россия Совуқ уруш давридаги Совет иттифоқининг хатти-ҳаракатларини эслатувчи “ўта тажовузкор” тактикага қайтмоқда.
Россиянинг 2024 йилдаги хулқ-атвори унинг Украинага қарши тажовузидан олдинги кузатувларимиздан тубдан фарқланади. Бу Россиянинг жанг майдонида дуч келаётган қийинчиликлари билан изоҳланади, деб таъкидлади вазир.
Франция ҳарбий-ҳаво кучлари мудофаани кучайтиришга қаратилган ҳарбий иттифоқ стратегияси доирасида НАТОнинг шарқий чегарасини мунтазам равишда назорат қилишни давом эттирмоқда. 2022 йилда Россиянинг Украинага кенг кўламли бостириб киришидан кейин, бундай вазифалар минтақада хавфсизликни таъминлаш учун устувор аҳамият касб этди.
Изоҳ (0)