Шимолий Кореяда Ким Чен Ин ва қизининг суратлари туширилган маркалар тақдим этилди. Улар 2022 йилнинг ноябрь ойида ўтказилган “Хвасон-17” қитъалараро баллистик ракетаси синовига бағишланган. Маркалар КХДР почтаси сайтида чоп этилди.
Ғарб экспертларининг фикрига кўра, ўн ёшли Ким Чу Энинг отаси билан тушган сурати фонидаги “Хвасон-17” ракета комплекси 15 минг км масофани босиб ўтади ва бир вақтнинг ўзида бир нечта ядровий зарядларни нишонга етказишга қодир бўлган алоҳида-алоҳида жанговар каллакларга эга.
Ўтган ҳафта Шимолий Корея етакчисининг қизи КХДР армияси ташкил этилганининг 75 йиллигига бағишланган ҳарбий парадда иштирок этганди, шундан сўнг Жанубий Корея ОАВлари унинг давлат раҳбари вориси бўлиши эҳтимолини муҳокама қила бошлади.
8 февраль куни ҳам Ким Чен Ин қизи билан оммага кўриниш берган. Ўшанда қиз ота-онаси билан Корея халқ армиясининг 75 йиллиги муносабати билан ўтказилган тадбирларда қатнашган.
Ноябрга қадар Шимолий Корея расмийлари Ким Чен Иннинг фарзандлари борлигини тасдиқламаган эди. Жанубий Корея разведкаси маълумотларига кўра, Ким ва унинг рафиқаси Ли Сол Чжунинг 2010, 2013 ва 2017 йилларда туғилган икки қизи ва бир ўғли бор.
Изоҳ (0)