Жанубий Корея пойтахти Сеул шаҳрида 30 май—1 июнь кунлари Халқаро фуқаро авиацияси ташкилоти (ICAO)нинг Амалга оширишни қўллаб-қувватлаш бўйича иккинчи глобал симпозиуми бўлиб ўтди, деб хабар бермоқда “Дунё” ахборот агентлиги.
Қайд этилишича, унда авиация ташкилоти бош котиби ва ташкилотга аъзо давлатларнинг транспорт вазирлари, авиация раҳбарлари ҳамда шу тизим вакиллари иштирок этган. Тадбирда транспорт вазири Илҳом Маҳкамов бошчилигидаги Ўзбекистон делегацияси ҳам қатнашган.
Симпозиум доирасида Илҳом Маҳкамов ICAO бош котиби Хуан Карлос Саласар билан учрашув ўтказган. Вазир Ўзбекистон ташкилотнинг атроф-муҳитни муҳофаза қилиш сиёсати ва амалиётини қўллаб-қувватлашини таъкидлаган. Илҳом Маҳкамов, шунингдек, Ўзбекистоннинг углерод чиқиндиларини камайтиришдаги энг самарали ҳиссаси Jet А-1 ярим синтетик (50/50) авиация ёнилғиси (SSF) ишлаб чиқаришни ўзлаштириш ва фуқаро авиациясида чиқиндиларни 20 фоизга камайтиришдан иборатлигини билдирган. Ўзбекистон транспорт вазири келажакда Uzbekistan GTL томонидан ишлаб чиқарилган тўлиқ синтетик авиация ёнилғисига ўтиш режалаштирилганини ҳам маълум қилган.
Учрашув якунида 5—6 июнь кунлари Самарқанд шаҳрида ICAO ишчи гуруҳининг “Тил бўйича профессионал талабларни жорий этиш” 42-сессиясини ўтказиш режалаштирилгани маълум қилинган.
Илҳом Маҳкамов Сингапур транспорт вазири Амий Хор билан ҳам учрашув ўтказган. Унинг доирасида томонлар Ўзбекистон аэропортларини ривожлантириш соҳасидаги Changi Airports International Pte компанияси билан ҳамкорлик ва PSA International компанияси билан Ўзбекистон ҳудудида замонавий контейнер терминалини ташкил этиш масалаларини муҳокама қилган.
Контейнер терминали — юк контейнерлари тўпланадиган, кейинги манзилга юборишгача бир жойга йиғиладиган объект. Терминаллар кемалар ҳамда қуруқликдаги транспорт воситалари учун ташкил этилган бўлиши мумкин.
Вазирлар Сингапур тажрибаси асосида Ўзбекистонда ерости метро линияларини лойиҳалаш ва қуриш муҳимлигини таъкидлаган. Шунингдек, икки мамлакат ўртасидаги ҳамкорлик ўз ичига транспорт тизимини ақлли бошқариш маркази ва Сингапур тажрибасини жорий этишни ҳам олиши қайд этилган.
Форум доирасида Индонезия транспорт вазири Буди Каря Сумади, Hyundai Motor Group, Кореа Airports ва Incheon аэропортлари вакиллари билан икки томонлама учрашувлар ўтказилган.