“Логистика — бу фақат юк ташиш эмас. Бу жараёнларни оптималлаштириш, муаммоларни ҳал қилиш ва глобал иқтисодиётнинг юрагини бошқариш санъатидир” дейди Ўзбекистоннинг логистика ва таъминот занжири соҳасидаги ёш ва мақсадли мутахассисларидан бири Бахтиёр Комилов.
Фарғона водийсида туғилиб ўсган Бахтиёрнинг карьера йўли — янги имкониятларни яратиш ва глобал миқёсдаги эътирофга эришиш ҳикоясидир.
Жанубий Кореядаги юқори сифатли таълим
Бахтиёр Комиловнинг таълим йўли Ўзбекистонда бошланиб, чет элда давом этган. У 2016 йилда Жанубий Кореядаги Чоннам миллий ниверситетининг иқтисодиёт ва бизнес бошқарув бўйича бакалаврият дастурига 100 фоиз грант асосида қабул қилинган. Талабалик даврида университетнинг Халқаро талабалар офисидаги фаолияти орқали у кўп миллатли муҳитда ишлаш кўникмаларини ривожлантирди ва халқаро алоқаларни шакллантирди.
Шунингдек, Бахтиёр Гвангжу шаҳар маъмурияти билан Кореянинг тиббий туризмини тарғиб қилишда фаол иштирок этди. У чет эллик беморларга ёрдам кўрсатиб, коммуникация ва бошқарув бўйича амалий кўникмалар орттирди. У маҳаллий радиода мунтазам чиқишлар қилиб, жамоатчилик билан ишлаш бўйича малакасини оширди.
Кореядаги профессионал юксалиш
Қаҳрамонимиз 2020 йилда бакалавр дипломини олганидан сўнг ўзи битирган нуфузли университетида MBA (бизнес бошқаруви бўйича магистратура) даражасида ўқишни давом эттириш имтиёзига эга бўлди. Бахтиёрнинг изоҳлаши бўйича, бу дастур унга бизнесни янада чуқурроқ тушунишга ва логистика қандай ишлашини ўрганишга имконият берди.
MBA ўқиши давомида Бахтиёр Кореянинг DХМ Korea компаниясида халқаро савдо ва логистика бўйича фаолият юритди. У тиббий ускуналарни Европа ва Осиё бозорларига экспорт қилиш жараёнларини бошқариб, компания учун янги ҳамкорлик имкониятларини яратди.
“Бу ишга киришар эканмиз, ҳақиқий бизнес жараёнларда амалий тажриба тўпладим ва карьерамнинг айнан мана шу босқичи менинг логистикага бўлган қизиқишимни янада кучайтирди”, дейди у.
АҚШдаги фаолият
2022 йилда Бахтиёр АҚШнинг Миссури штатидаги University of Missouri-St. Louis’да икки даражали MBA дастурига ўқишга кириб, таъминот занжири менежменти бўйича сертификатга эга бўлди. Бу ерда у ўқиш билан бирга талабалар учун консалтинг хизматлари кўрсатиб, логистика бўйича билимларини бўлишди. У, шунингдек, талабалар ва профессорлар билан семинарлар ташкил этиб, академик муҳитда фаолият юритди.
АҚШда икки даражали MBA дастурини тамомлаган Бахтиёр таъминот занжири менежменти соҳасидаги малакасини янада оширди. 2022 йил декабрь ойида у ERP тизимларининг таъминот занжирини мустаҳкамлашдаги аҳамияти ҳақида илмий мақола ёзди. Бу ишида у ERP тизимларининг пандемия каби глобал инқирозлар даврида таъминот занжирини барқарор сақлашдаги аҳамиятини таҳлил қилди ва замонавий технологиялар, масалан, cloud computing, big data ва blockchainнинг ERP тизимларига қўшган ҳиссасини ёритди.
ERP тизимлари: Логистикада революциялар пойдевори
ERP (Enterprise Resource Planning) тизимлари — бу корхоналар учун ягона тизимда барча ресурслар ва жараёнларни бошқаришга ёрдам берадиган дастурий ечимлар. Бахтиёрнинг тадқиқотида ERP тизимларининг таъминот занжиридаги асосий функциялари чуқур таҳлил қилинди. ERP тизимлари нафақат жараёнларни марказлаштириш ва ресурсларни бошқаришда, балки реал вақт маълумотлари асосида қарор қабул қилишда ҳам муҳим рол ўйнайди.
Бахтиёрнинг сўзларига кўра, ERP тизимлари таъминот занжирининг учта асосий оқими – моддий оқим, ахборот оқими ва молиявий оқимни оптималлаштириш орқали корхона самарадорлигини оширади.
ERP тизимларининг технологик жиҳатларини тадқиқ қилар экан, у СAP С/4HANА, Oracle Fusion Cloud ERP ва Microsoft Dynamics 365 каби тизимларнинг глобал таъминот занжирида қандай қўлланилишини ўрганиб чиқди.
У ERP тизимларининг рискларни бошқариш, иш фаолиятини соддалаштириш ва таъминот занжири барқарорлигини оширишдаги амалиётларига катта эътибор қаратди.
Ҳозирги фаолияти ва келажак режалари
Бахтиёр АҚШнинг ITF Group компаниясининг HaulerHub платформасида менежер лавозимида ҳам фаолият олиб борган. У транспорт компанияларини ушбу платформага интеграциялаш жараёнларини бошқариб, 2000 дан ортиқ транспорт компанияларининг самарадорлигини оширишга ҳисса қўшган.
Бу лавозимда у ERP тизимларининг ўзига хос имкониятларини амалда қўллаш орқали таъминот занжирида рақобатбардошликни оширишга ёрдам берган.
Бахтиёрнинг келажакдаги режалари ҳам ERP тизимлари билан узвий боғлиқ.
У сунъий интеллектдан фойдаланган ҳолда логистика жараёнларини янада оптималлаштириш учун янги платформа яратиш устида иш олиб бормоқда. Ушбу инновацион ечим орқали у кичик ва ўрта бизнес корхоналарига операцион самарадорликка эришишда ёрдам беришни мақсад қилган.
Бахтиёр Комиловнинг муваффақият йўли ва глобал майдондаги таъсири Ўзбекистонда шу соҳани ўрганаётган ёшларига илҳом манбаи бўла олади. Бахтиёр ўзининг логистика ва таъминот занжири соҳасидаги инновацион ёндашувлари ва етакчилик қобилиятлари унга келгусида катта ютуқлар олиб келишига ишонади.
Саидазиз Аъзамов
Изоҳ (0)