Жанубий Корея президенти Юн Сок Ёл икки йил аввал қоидаларни бузган ҳолда рафиқаси совға қилинган қимматбаҳо сумкани олгани учун омма олдида узр сўради. Бу ҳақда Korea Herald хабар берди.
“Хотинимнинг ўйламай қилган хатти-ҳаракати туфайли жамоатчиликда уйғотган ташвиши учун узр сўрайман”, — деди Юн Сок Ёл жонли эфирда.
Тегишли баёнот Корея раҳбарининг рафиқаси Ким Гон Хи атрофида 2022 йилда юзага келган можаро сабабли янгради. Ўшанда президент рафиқаси корейс миллатига мансуб америкалик руҳонийдан 3 миллион вон (2,2 минг доллар)лик қимматбаҳо Christian Dior сумкасини совға сифатида қабул қилганди. Ўшанда руҳонийнинг ўзи Ким Гон Хо билан суҳбатлашиш жараёнини яширинча тасвирга олган. Видеода совға қилинган сумка ҳам кўринган.
Буларнинг барчаси катта жанжални келтириб чиқарган, бу нафақат президент ва унинг рафиқаси, балки бутун ҳукмрон партиянинг обрўсига жиддий путур етказган. Бироқ Юн Сок Ёл узоқ вақт давомида можарога жавоб беришдан бош тортган ва ҳодиса юзасидан мустақил тергов ўтказиш талабларини эътиборсиз қолдирган.
Натижада ҳатто ҳукмрон партияда ҳам президентдан жанжалга ошкора жавоб беришни талаб қила бошлашган. Сиёсатшуносларга кўра, 10 апрель куни бўлиб ўтган парламент сайловларида ҳукмрон партиянинг мағлубиятга учрашига “президент рафиқаси сумкаси билан боғлиқ жанжал” сабаб бўлган.
Мамлакат аҳолисининг 70 фоизга яқини тергов ўтказилишини талаб қилган. Бир неча кун аввал Жанубий Корея расмийлари Корея Бош прокуратураси Ким Гон Хининг маркали сумка кўринишидаги қимматбаҳо совға олиш иши бўйича ишини расман кўриб чиққанини маълум қилганди. Мазкур иш устида бир қанча таниқли прокурорлар ишламоқда.
Матбуот анжумани чоғида Юн Сок Ёл шахсан узр сўрашдан ташқари, можарога оид тафсилотлар айтишдан бош тортган. Шунингдек, бу иш бўйича тергов аллақачон олиб борилаётгани ва унинг баёнотлари тергов жараёнига таъсир ўтказишга уриниш сифатида қабул қилинишини билдирган.
Изоҳ (0)