Жанубий Корея ҳарбийлари чегарани кесиб ўтган Шимолий Корея аскарларига ўқ узган. Бу ҳақда 11 июнь куни Корея ҳарбий маъмурияти баёнотига асосланиб, Тҳе Кореа Times нашри хабар берди.
Манбада айтилишича, Шимолий Корея ҳарбийлари икки мамлакат ўртасидаги қуруқлик чегарасини 9 июнь куни бузиб ўтган. Жанубликларнинг огоҳлантирувчи ўқларидан сўнг улар ортига қайтган.
Чегарани бузган шимол аскарлари сони 20 нафар атрофида бўлган. Жанубий Кореянинг Бирлашган штаб бошлиқлари қўмитаси ушбу хабарни тасдиқлаган.
Демилитаризация зонаси атрофида юз берган воқеа Жанубий Корея нашрлари томонидан жонли эфирда намойиш қилинган. Кескинлик оқибатида томонларда жароҳатланган аскарлар бўлмаган.
“Улар ҳеч қандай йўл бўлмаган бутазор бўйлаб ҳаракат қилишди. Биз уларни демилитаризация зонасига яқинлашмасдан олдин ҳам кузатаётгандик”, — деган Бирлашган штаб бошлиқлари қўмитаси матбуот котиби Ли Сунг -Жун
Чегарани бузган аскарларнинг бир қисми қуролланган бўлган. Кўпчилиги эса иш қуролларини олиб юрган. Улар қандай мақсадда чегарадан ўтгани аниқланмаган.
Демилитаризация зонаси дунёдаги энг кучли қўриқланадиган ҳудудлардан бири бўлиб, тиканли симлар билан ўралган. Зонанинг ҳар икки томонида йирик ҳарбий контингент жойлашган.
Ушбу зона 1950-1953 йиллардаги Корея уруши сулҳ билан якунланганидан бери икки Корея давлати ўртасида буфер зона бўлиб хизмат қилмоқда. Ушбу демилитаризация зонаси Шимолий ва Жанубий Кореяни горизонтал равишда иккига бўлади.
Изоҳ (0)