Жанубий Кореядаги Инчхон аэропортида беш нафар россиялик қолиб кетди, мамлакат ҳукумати уларга сиёсий бошпана беришдан бош тортди. Улар Россияни сафарбарлик туфайли тарк этган. Уларнинг баъзилари аэропортда яшаётганига икки ойдан ошди, деб ёзади The Korea Times.
Нашр маълумотларига кўра, россияликлар бевосита аэропортда туриб, бошпана тақдим этиш ҳақида аризалар берган. Бироқ Корея ҳукумати армияга чақириқдан бош тортиш қочқин мақомини тақдим этиш учун асосли сабаб бўла олмайди, деб ҳисоблаб бу сўровларни рад этди.
Россияликлар бу қарордан норози бўлиб, шикоят аризаси бермоқчи. Уларнинг вакили Ли Чон Чан даъво қилишича, уларда қочқин мақомини олиш учун асослар бор, чунки Россияда улар сиёсий сабабларга кўра таъқиб қилиниши мумкин.
Россияликларнинг иши бўйича якуний қарор суд томонидан чиқарилади. The Korea Times ёзишича, агар судья уларнинг ёнини олса, уларга G-1 визалари берилади, бу улар қочқин мақомини олиш учун расмий текширув жараёнидан ўтгунига қадар Жанубий Кореяда вақтинчалик бўлиб туришини кафолатлайди. Агар суд уларга қарши қарор чиқарса, ариза берувчилар, катта эҳтимол билан, Россияга депортация қилинади.
Россияда сафарбарлик 21 сентябрь куни бошланганди, Россия ҳукумати даъво қилишича, у октябрь охирида якунланган, бироқ Россия президенти Владимир Путин ҳалигача тегишли фармонни имзолагани йўқ. Ҳукумат бундай ҳужжатга зарурат йўқлигини таъкидламоқда.
2023 йил январида Украина ҳарбий разведкаси Россияда сафарбарликнинг иккинчи тўлқинига тайёргарлик кўрилаётганини, унинг доирасида яна 500 минг киши армияга чақирилишини маълум қилди.
Изоҳ (0)