Корея Республикаси Миллий Ассамблеяси депутатлари итларни гўшти учун кўпайтириш ва сўйишни тақиқловчи қонун лойиҳасини маъқуллади, деб хабар бермоқда Жанубий Кореянинг Yonhap агентлиги.
The Korea Times газетасининг ёзишича, қонун лойиҳасини 208 депутат қўллаб-қувватлаган, яна икки парламентарий бетараф қолган. Энди ҳужжатни президент имзолаши керак.
Итни истеъмол учун кўпайтириш, сўйиш ва гўштини сотишни тақиқлаш ҳақидаги қонун 2027 йилдан кучга кириши кутилмоқда. Yonhap хабарига кўра, тақиқни бузганлик учун 30 миллион вонгача (тахминан 22 минг доллар) жарима солинади, шунингдек, қамоқ жазоси ҳам назарда тутилади. Хусусан, наслдор итларнинг гўштини озиқ-овқат сифатида истеъмол қилганлар икки йилгача, сўйганлар эса уч йилгача озодликдан маҳрум этилиши мумкин.
Қонун кучга киргунга қадар мамлакатда уч йиллик имтиёзли давр бўлади, унда ҳеч қандай жазо чоралари қўлланмайди. Ит гўштини истеъмолга тайёрловчи корхоналар ва одамлар маҳаллий ҳокимият органларига бу соҳадан воз кечиш режасини тақдим этса, улар давлат томонидан қўллаб-қувватланиши мумкин.
Жанубий Кореяда ҳукумат статистикасига кўра, ҳозирда мамлакатда ит гўштидан тайёрланган маҳсулотларни сотувчи 1150 га яқин ит фермаси, 34 та гўштни қайта ишлаш заводи, 219 та дистрибютор ва 1600 га яқин ресторан мавжуд.
Сўнгги бир неча йил давомида Жанубий Кореяда ит гўштини тақиқлаш ғояси муҳокама қилинмоқда. 2023 йил декабрь ойида Сеулда жойлашган Ҳайвонлар фаровонлиги бўйича хабардорлик, тадқиқот ва таълим таҳлил маркази икки минг киши ўртасида сўров ўтказди. Респондентларнинг 94 фоиздан ортиғи бир йил давомида ит гўшти емаганини, 93 фоизга яқини эса келажакда ит гўштини емоқчи эмаслиги ҳақида айтган. Бундан ташқари, респондентларнинг 82 фоиздан ортиғи итларни озиқ-овқат сифатида истеъмол қилиш учун кўпайтириш ва сўйишни қонун билан тақиқлашни қўллаб-қувватлади.
Изоҳ (0)