Бугунги қаҳрамонларимиз Корея драмаларидаги роллари билан жаҳон миқёсида машҳурлик ва муваффақиятга эришган. Гарчи аёлларнинг ёшини сўраш чиройли одат бўлмаса ҳам, биз уларнинг бугун неча ёшда эканлигини ҳамда актрисаларнинг табиий гўзаллик ва ёшлик сирларини билишни истадик.
Ким Хи Э (56 ёшда)
“Турмуш” драмаси туфайли кўпчиликка танилган Ким Хи Э 56 ёшда ва у бугунги кунда Жанубий Кореядаги энг нуфузли драма актрисалардан биридир. Ким неча ёшга тўлганини яширмайди ва қаришдан қўрқмайди. У косметик инексиялар ва пластик жарроҳлик хизматларидан умуман фойдаланмайди. Интервьюларда актриса ўз ҳуснини тиббиётга ишониб топширмаслигини бот-бот такрорлайди. Ёшлик ва гўзалликни сақлаб қолиш учун у барвақт уйқуга ётади, спиртли ичимликлардан ўзини тияди, қуёшда узоқ вақт қолмайди, тез-тез ёнғоқ истеъмол қилади ва ҳазм тизими яхши ишлаши учун маракуйя шарбатини ичади.
Ко Хён Жонг (53 ёшда)
Ко Хён Жонг 1989 йилда “Корея гўзали” танловида кумуш медални қўлга киритгандан сўнг кинода карьерасини бошлади. Бугунги кунга қадар у 17 та лойиҳада, жумладан, “Қум соати”, “Президент хоним” ва “Қиролича Сондок” каби драмаларда иштирок этган. Хён Жонг 53 ёш бўлишига қарамай, жисмонан бақувват ва ёш кўринади. Тҳе Гуру Show нашрига берган интервьюсида актриса ташқи кўринишига пластик жарроҳлик аралашувига кескин қарши эканлигини ва фақат массаж ҳамда терини парвариш қилиш муолажалари ёрдамида ёш кўринишини айтган. Шунингдек, Хён Жонг қишнинг қаттиқ совуқ кунларида ҳам иситиш тизимини ёқмаслиги, батареялар юз терисини қуритиб юборишини таъкидлаган.
Су Чжон Хи (63 ёшда)
Актриса Су Чжон Хи 63 ёшда эканлигига камдан кам одам ишонади. 80–90 йилларда Сузи ва Солхен тахаллуси остида ижод қилган модел, актриса ва хонанда “Такси” лойиҳасида экранларга қайтди ва бир неча кун давомида Корея ижтимоий тармоқларида энг кўп муҳокама қилинадиган шахсга айланди. Чунки санъатга қайтган 90 йиллар актрисасининг юзида бирорта ҳам ажин кўринмас эди. Су Чжонг Хи ўзининг гўзаллик сирларини ошкор этмайди.
Аммо айнан балет машғулотлари унинг қоматини чиройли сақлаб қолишда ёрдам беришини яширмайди. Унинг тренери айтишича, “ҳатто йигирма ёшли қизлар актриса бажарадиган ҳаракатларни қила олмайди”.
Ли Ёнг Э (53 ёшда)
Кореялик актриса Ли Ёнг Эни ватандошлари “миллат юзи” деб аташади. Ўз карьерасини 90 йилларда реклама роликлари билан бошлаган Ли кейинчалик кўплаб муваффақиятли лойиҳаларда — “Севги ва никоҳ”, “Ота” ва бошқа драмаларда иштирок этди. Актриса 2000 йилда “Бирлашган хавфсизлик ҳудуди” ҳарбий драмаси ва “Сарой жавоҳири” тарихий драмасида иштирок этганидан сўнг шуҳрат қозонди. Унинг сўзларига кўра, Ли Ёнгнинг ҳеч қандай гўзаллик сирлари йўқ:
“Гўзаллик бу — соғлиқ. Саломат ва кучли бўлиш учун сиз етарлича ухлашингиз, хотиржам бўлишингиз ва кўп хайрли амалларни бажаришингиз керак”, — дейди актриса.
Дарҳақиқат, актриса кўплаб эзгу ишларга қўл урган. 1997 йилда юлдуз яхши ният элчиси сифатида Эфиопияга борди, 2004 йилда у БМТнинг болалар жамғармаси — ЮНИСЕФга аъзо бўлди. 2017 йилда Ли Ёнг Э ҳарбий машғулот пайтида снаряд портлаши оқибатида ҳалок бўлган икки ёш аскарнинг оналарига 150 миллион вон (қарийб 110 минг доллар) хайрия қилди.
Ким Сонг Рён (57 ёшда)
1988 йилда “Корея гўзали” унвонига сазовор бўлган Ким Сонг Рён “Аждарҳонинг тирноқларини ким кўрди?” фильми орқали кино саноатига кириб келди ва 30 йил давомида шу соҳада фаолият олиб борди. Бугунги кунда 57 ёшли Сонг Рён кўпроқ драма қаҳрамонларининг оналарини ўйнайди. Актрисанинг айтишича, гўзал бўлиш учун унга мунтазам пилатес машғулотлари ва массаж ёрдам беради. Ким спиртли ичимликлар истеъмол қилмайди ва терининг эластиклигини сақлаб қолиш учун ҳар куни намловчи воситалардан бир неча бор фойдаланади.
Ом Чон Хва (54 ёшда)
ELLЕ Korea нашрига берган интервьюсида айтишича, у болалигидан актриса бўлишни истаган, бироқ кинода катта муваффақиятларга эришишини тасаввур ҳам қила олмаган. Бугунги кунда 54 ёшли Хва 35 дан ортиқ лойиҳалар иштирокчисидир. У соғлом бўлиши ва ёш кўриниши учун доимий спорт билан шуғулланади, кето парҳезга амал қилади ҳамда косметикадан кўп фойдаланмайди.
Изоҳ (0)