Жанубий Кореянинг Сеул шаҳридаги Инчхон халқаро аэропорти Шимолий Кореядан учирилган чиқинди ортилган ҳаво шарлари туфайли халқаро ва ички рейсларни тўхтатди ёки кечиктирди. Бу ҳақда Коrea Times хабар берди.
Самолётларнинг учиши ва қўниши 26 июнь куни маҳаллий вақт билан соат 1:46 дан 4:44 гача қолдирилган ёки тўхтатилган. Қарор ҳаво шарлари самолёт двигателларига кириши мумкинлиги эҳтимолига қабул қилинган. Рейслар одатдаги жадвалга мувофиқ маҳаллий вақт билан 07:00 дан амалга оширила бошланган.
24 ва 25 июнь кунлари тунда Шимолий Корея жануб томон 350 га яқин чиқинди солинган шарлар учирди. Жанубий кореялик фаоллар томонидан ташвиқот варақалари Шимолий Кореяга ташлаб юборилишига жавобан 28 майдан бери жами олтита шундай акция ўтказилган. Шимол учирган ҳаво шарлари ичидан ахлат, ҳашаротлар ва қуртлар топилган. Тутиб олинган шарлар ичидан портловчи ёки бошқа хавфли воситалар бўлмагани айтилмоқда.
Изоҳ (0)