Шимолий Корея ҳукумати Ким Чен Иннинг қизини мамлакатнинг янги раҳбари сифатида кўриб, уни раҳбарликка тайёрламоқда. Бу ҳақда The Korea Times нашри хабар берди.
Манбада айтилишича, шимолдаги корейс давлати раҳбарияти Ким Чен Иннинг қизини раҳбарликка потенциал ворис сифатида кўрган ва уни “буюк раҳбар” сифатида тайёрлашга киришган. Номаълум сабабларга кўра Шимолий Корея нашрларида бўлғуси раҳбарнинг “буюк шахсияти”ни ифода этувчи хабарлар тарқала бошлаган.
Шимолий Кореянинг давлат нашри ҳисобланган Rodong Sinmun газетаси 28 июль куни Пхеньяндаги иссиқхона фермасини кўздан кечирган Ким Чен Ин ҳамда унинг қизи Ким Жу Э суратларини эълон қилган. Газетада мамлакатнинг икки эътиборли вакили “етакчи буюк шахслар” дея таърифланган. Бу таърифни кўплаб Жанубий Корея нашрлари Шимолий Корея етакчиси ўзгариши мумкинлигига ишора сифатида талқин қилган.
Пхеньян раҳбарининг қизи етакчи сифатида тасвирланиши Шимолий Корея учун янгилик бўлиб, олдин бундай таъриф асло ишлатилмаган. Шимол матбуоти етакчининг қизи ҳақида жами бўлиб шу кунга қадар 26 та манба чоп этган. Уларнинг 23 тасида Ким Жу Э отаси билан ҳарбий иншоотларга, яна 3 тасида эса иқтисодий зоналарга ташриф буюрган.
Мутахассисларнинг таъкидлашича, Жу Энинг давлат оммавий ахборот воситаларида қайта-қайта кўрсатилиши унинг Шимолий Корея сиёсатидаги алоҳида роли ва ҳокимият тепасига кўтарилиши мумкинлигини таъкидлайди. Вақти-вақти билан Ким Чен Ин соғлиғи ёмонлашгани билан боғлиқ хабарлар тарқалиши ҳам сўнгги янгиликни тасдиқлаши мумкин.
Rodong Sinmun газетаси, шунингдек, Ким Чен Иннинг қизига нисбатан “ҳянгдо” атамасини қўллаган. Бу атама “раҳнамо” деган маънони билдириб, фақатгина мамлакат ворисларига нисбатангина қўлланган. Бу атама қўлланиши одатда бўлғуси раҳбарнинг мансабга тайинланишига оз қолганини билдирган.
Маълумот ўрнида, Ким Жу Э Шимолий Корея нашрларида илк бор 2022 йил охирида, отаси билан бирга янги қитъалараро баллистик ракетани учириш тадбирида кўриниш берган. Ўшандан бери у отасининг кўплаб жамоат ишларида, жумладан, ҳарбий машғулотларда қатнашган. Шимолий Корея ҳукумати доҳийнинг қизига кўплаб расмий номлар берган. Дастлаб у “Суюкли фарзанд” унвони билан тақдирланган. Кейинчалик бу орден “Ҳурматли фарзанд” унвонига алмаштирилган. 2023 йилда эса Пхеньяндаги коммунистик партия бошқарув кенгаши Ким Чен Иннинг қизига “Тонгги юлдуз генерали” унвонини берган.
Изоҳ (0)