Жанубий Корея президенти Юн Сок Ёл келаси ҳафта Марказий Осиёнинг учта давлати — Туркманистон, Қозоғистон ва Ўзбекистонга ташриф буюради. Бу ҳақда Korea Times хабар берди.
Корея минтақанинг бешта давлати, жумладан, Қирғизистон ва Тожикистон иштирокида “Корея—Марказий Осиё” саммитини ташкил этиш ва 2025 йил Сеулда унинг йиғилишини ўтказишни режалаштирмоқда. Саммит Корея ва Марказий Осиё давлатлари билан ҳамкорлик учун янги платформа яратишга қаратилган K-Silk Road ташаббуси доирасида ўтказилмоқда.
K-Silk Road ташаббуси Кореянинг Марказий Осиё минтақаси билан ҳамкорлигини бир поғона юқорига ошириш режасини ўз ичига олади. Ташаббус орқали биз эркин, тинч ва фаровон Корея ҳамда Марказий Осиёни илгари суришда биргаликда ҳаракат қиламиз, — дейди Сеул миллий хавфсизлик директорининг биринчи ўринбосари Ким Таэ Ҳё.
Ташаббус ҳамкорлик тўртта асосий устунга эга: ресурслар, ривожланишга расмий ёрдам, маданий ва одамлар алмашинуви, ҳукумат ва хусусий даражадаги нетворкинг. Ушбу устунларга асосланиб, Корея бешта давлатнинг ҳар бири билан тегишли соҳаларда мослаштирилган ҳамкорликка эътибор қаратади.
Масалан, Корея Қозоғистон билан энергетика ва инфратузилма, Қирғизистон билан сув ресурслари ва туризм, Туркманистон билан энергетика станциялари бўйича ҳамкорликка эътибор қаратади.
Ушбу ташаббус табиий газ захираларига, уран, литий ва волфрам каби асосий фойдали қазилмаларга бой минтақанинг стратегик аҳамияти ортиб бораётганини билдиради. Шу сабабли 2022 йилдан бери АҚШ, Европа Иттифоқи ва Германия “5+1” саммитларини ўтказмоқда, Россия ва Хитой ҳам Марказий Осиё билан алоқаларини чуқурлаштирмоқда, — дейилади хабарда.
Ташаббусни амалга ошириш учун Корея президенти 10—15 июнь кунлари Туркманистон, Қозоғистон ва Ўзбекистонга давлат ташрифи билан боради.
- 10 июнь куни у Туркманистон президенти Сердар Бердимуҳамедов билан саммит ўтказади, эртаси куни эса икки давлат компаниялари иштирок этадиган бизнес-форумда қатнашади.
- Корея раҳбари 11 июнь куни Қозоғистонга ташриф буюриб, 12 июнь куни президент Қосим-Жўмарт Тўқаев билан саммит ўтказади. Давлат раҳбарлари, шунингдек, икки мамлакат компаниялари иштирок этадиган бизнес-форумда иштирок этишни режалаштирган.
- 13 июнь куни сиёсатчи Ўзбекистонга келади ва президент Шавкат Мирзиёев билан учрашади, 14 июнь куни эса бизнес-форумда иштирок этади. Саёҳатда унга рафиқаси Ким Кеон Ҳи ҳам ҳамроҳлик қилади.
Корея президенти администрациясининг юқори мартабали вакили Марказий Осиё ёш, динамик демографик тузилишга эгалигини таъкидлаган.
“АҚШ ва Хитой каби глобал кучлар минтақа билан алоқаларини мустаҳкамлашга интилмоқда. Бироқ бу мамлакатлар сармоя ва қўллаб-қувватлаш позициясида баъзан ўзларини босим остида ҳис қилишлари ёки очиқчасига айтганда, империализмнинг янги шаклига дучор бўлишлари ҳақида хавотирлар мавжуд”, — дейилади хабарда.
Шу сабабли Кореянинг ёндашуви ушбу давлатлар томонидан олқишланмоқда. Уларнинг Корея билан ҳамкорлик қилиш истаги инфратузилма, саноатни ривожлантириш, иқлим ва рақамли саъй-ҳаракатларни қамраб олади.
Изоҳ (0)