Жанубий Кореяда ноқонуний юрган ўзбекистонликлар учун “яшил йўлак” орқали мамлакатдан чиқиб кетиш муддати 2025 йилнинг 31 январигача узайтирилди. Бу ҳақда Миграция агентлиги хабар берди.
Агентликнинг Сеулдаги ваколатхонаси ва Корея Адлия вазирлиги ўртасида ўтказилган музокаралар натижасида имзоланган ҳужжатга кўра, 30 ноябрь куни тугаши лозим бўлган “яшил йўлак” лойиҳаси 2025 йилнинг 31 январгача узайтирилди. Ушбу мамлакатда ноқонуний юрган ўзбекистонликлар шу санага қадар “яшил йўлак”дан фойдаланиб эркин чиқиб кетиши мумкин.
Кореяда ноқонуний ишлаб, яшаб юрган шахслар қуйидаги миқдорда жарима тўлайди:
- 1 ойдан кам бўлса 1,000,000 вон (716 доллар);
- 1 ойдан 3 ойгача 1,500,000 (1 074 доллар);
- 3 ойдан 6 ойгача 2,000,000 (1 432 доллар);
- 6 ойдан 1 йилгача 4,000,000 (2 864 доллар);
- 1 йилдан 2 йилгача 7,000,000 (5 012 доллар);
- 2 йилдан 3 йилгача 10,000,000 (7 160 доллар);
- 3 йилдан 5 йилгача 20,000,000 (14 321 доллар);
- 5 йилдан 7 йилгача 25,000,000 (17 902 доллар);
- 7 йилдан кўп бўлса 30,000,000 (21 482 доллар).
“Кўрсатилган муддат ичида Кореяни ихтиёрий тарк этсангиз юқоридаги жарималардан озод этиласиз, кейинчалик Кореяга қайта киришингиз енгиллашади”, дейилади хабарда.
Қайд этилишича, ушбу муддат тугаганидан сўнг фуқаро Кореяда яна қоладиган бўлса, Миграция агентлиги томонидан шартнома бандларига кўра фуқаро ёки унинг кафилига нисбатан катта миқдорда жарима; (ҳар бир ойи учун 2000 доллар), Корея томонидан қайта киришга тақиқ қўлланилади.
Шу сабабли Вазирлар Маҳкамаси ҳузуридаги Миграция агентлиги Кореяда фаолият юритаётган фуқаролардан ушбу давлатнинг қонунчилигини бузмасликни, юқорида кўрсатилган муддат ичида Ўзбекистонга қайтишларини сўради.
Жанубий Кореядаги ўзбекистонликлар сони қанча?
Корея Республикаси иммиграция хизмати маълумотига кўра, ҳозирги вақтда 92 000 нафар ўзбекистонлик қонуний ва 9000 нафар ўзбекистонлик эса ноқонуний тарзда ушбу давлат ҳудудида бўлиб турибди. Корея Республикаси Адлия вазирлигига кўра, агар бир давлат фуқароларининг 10 фоизидан ортиқ қисми ноқонуний статусда бўлса, ўша давлат фуқароларига виза чекловлари жорий этилиши мумкин.
Сўнгги маълумотларга кўра, Жанубий Кореяда ноқонуний мигрантлар 410 мингдан ошган. Мамлакатда жами 2,6 миллион хорижлик борлиги инобатга олинса, тахминан ҳар олтинчи мигрант ноқонуний ҳисобланади. Ноқонуний мигрантларнинг 145 мингдан ортиғини таиландликлар, 15 мингга яқинини хитойликлар, 10 мингдан ортиғини қозоғистонликлар ташкил этади.
Изоҳ (0)