Саудия Арабистонининг “Ан-Насср” клуби ва Португалия терма жамоаси ҳужумчиси Криштиану Роналду ўзининг жисмоний ҳолатини сақлашга ёрдам берадиган таом номини айтди. Бу ҳақида Daily Mail нашри хабар берди.
Роналду 40 ёшида ҳам ажойиб спорт формасини сақлаб турибди. Бунда ҳужумчига Португалиянинг анъанавий таомларидан — бакалҳау а брас ёрдам беради. Ушбу таом таркибида тузланган треска, пиёз, ингичка кесилган картошка ва тухум каби маҳсулотлар бор.
Роналдунинг ўзи ушбу таом ҳақида шундай дейди: “бу овқат болалигимни эслатади ва менга куч беради”.
Футболчи қатъий парҳезга амал қилади. У одатда шакар ҳамда спиртли ичимликларни оз истеъмол қилиб, чанқоқни қондириш учун фақат сув ичади.
Маълумот учун, жорий мавсум Роналду “Ан-Насср” таркибида барча мусобақаларда 33 та ўйинда қатнашиб, 28 гол ва 4 голли узатма муаллифига айланди. Унинг клуб билан шартномаси 2025 йил ёзигача амал қилади. Transfermarkt порталида футболчининг нархи 12 миллион еврога баҳоланмоқда.
Изоҳ (0)