Аксарият инсонлар йил бошидан ўзига тўғри овқатланишга ўтишга ваъда беради, албатта, бу вазн йўқотиш ёки саломатликни яхшилаш учун. Бироқ кўпчилик бу фикрдан тезда воз кечади, чунки улар натижаларни дарҳол кўрмайди. Ҳақиқатан ҳам тўғри овқатланиш кескин вазн йўқотиш ёки саломатликнинг яхшиланишига олиб келмайди. Шунга қарамай, атиги 10 кун ичида организмда ижобий ўзгаришлар рўй беради, деб ёзади Marie Claire.
Кўпгина соғлом овқатланиш тизимларининг асосий тамойилларидан бири рационда шакар ва углеводларни чеклашдир. «Шакар миянинг мукофот фаолиятини рағбатлантиради, бу янада кўпроқ шакарли маҳсулотлар истеъмол қилишга мажбур қилади, — деди парҳезшунос Роб Хобсон The Telegraph нашрига. — Шакарни чеклашда баъзи одамлар чарчоқ, кайфиятнинг тушиши ва концентрациянинг пасайиши каби баъзи аломатларга дуч келиши мумкин».
Бироқ бу фақат қисқа муддатли таъсирлар бўлиб, улар умумий саломатликнинг яхшиланиши билан тўлиқ қопланади. Хобсоннинг сўзларига кўра, шакар ва тез углеводларни чеклаш ортиқча вазнни йўқотишга ёрдам беради, ичак фаолиятини яхшилайди, энергия даражасини оширади ва диабет ҳамда юрак касалликлари хавфини камайтиради.
Тўғри овқатланишга ўтишда кўпчилик ўз олдига қўйган яна бир мақсад гўштни рад этишдир. Ҳа, у ҳам бир неча кун ичида ўз натижасини беради.
Ёзувчи Рейчел Аманинг таъкидлашича, гўштдан воз кечганидан 10 кун ўтгач, у ўзини анча енгил ва бақувват ҳис қилди. «Овқатдан кейин тўйдим, лекин шу билан бирга гўшт истеъмол қилгандан кейин пайдо бўладиган оғирлик ва ноқулайликни ҳис қилмадим», — дейди Рейчел.
Аммо бутунлай вегетариан бўлиш шарт эмас. Ёғли қизил гўштдан воз кечиш ҳам яхши фикрдир. Бу овқат ҳазм қилиш тизимининг ишига ижобий таъсир қилади, чунки парҳезсунослар гўштни алмаштиришни тавсия қиладиган сабзавот, мева ва донлар ичакларда фойдали бактерияларнинг кўпайишига ёрдам беради.
Тўғри овқатланишнинг деярли ҳар бир тизими спиртли ичимликларни рад этишни ҳам талаб қилади. Бу қарор, албатта, бир қанча ўзгаришларга олиб келади.
Биринчидан, юз ранги яхшиланади ва шиш йўқолади, иккинчидан, энергия ва концентрация даражаси ошади. Учинчидан, яхшироқ ухлашни бошлайсиз. «Уйқу яхшиланади ва эрталаб ўзингизни тетик ҳис қиласиз», — дейди профессор Дэвид Натт. Бундан ташқари, профессорнинг фикрига кўра, спиртли ичимликларсиз бор-йўғи ўн кун ичида жигар фаолиятини тиклайди ва қон босими меъёрга келади.
Изоҳ (0)