Асли мутахассислиги бошқа бўлса ҳам, санъат соҳасида фаолият юритаётганлар кўплаб топилади. Кези келганда, уларнинг таълим олмагани ва устоз кўрмагани танқид ҳам қилинади. Аммо бир муддат санъат соҳасида фаолият юритиб, кейин бутунлай бошқа соҳанинг этагидан тутганлар ҳам бор. Улар қанчалик машҳур бўлишмасин, ҳозир оддий инсонлар каби фаолият юритишади.
Мадина Мумтоз
Ўзбекистон давлат Консерваториясига имтиёз асосида қабул қилинган, профессионал хонанда Мадина Мумтоз аллақачон санъатни тарк этган. У бир муддат фудблогер сифатида фаолият юритди. Ҳозир эса тўрт нафар фарзанди ва бизнеслари билан овора.
Мадина Ниғматуллаева
“Журналист” сериалидаги роли билан томошабинларга яхши таниш бўлган Мадина Ниғматуллаева ҳам аллақачон санъатни тарк этган. Бир муддат бошловчи сифатида ишлади, оила қургач эса ўз мутахассислиги бўйича ишлашни маъқул кўрди. У ҳозирги кунда психолог сифатида фаолият юритади.
Лобар Полвонова
“Муҳаббат синовлари” фильмидаги Рухшона роли билан томошабинларга яхши таниш бўлган Лобар Полвонова негадир актрисалик фаолиятини давом эттиришни истамади. Сўнгги ролини 2006 йили “Ҳаёт-мамот” фильмида ижро этди. У 2005 йилдан буён Алишер Навоий номидаги Ўзбекистон давлат академик катта театрида либослар бўйича рассом бўлиб ишлаб келмоқда. “Алишер Навоий” спектакли ва “Фауст” операси учун яратган либослари томошабинлар эътирофига сазовор бўлди.
Негадир у омма эътиборида бўлиш ва актрисалик фаолияти ҳақида интервью беришни истамайди. Шахсий ҳаёти билан боғлиқ маълумотларни ҳам сир сақлайди.
Суғдиёна Азимова
Актриса Суғдиёна Азимова оила қургач, Саудия Арабистонига кўчиб ўтган. У турмуш ўртоғи билан бирга тур фирмада фаолият юритади. Фирма ўзбекистонлик зиёратчиларга хизмат кўрсатади.
Музаффар Саъдуллаев
“Осмондаги болалар” фильмидаги Ҳамдам роли билан томошабинларнинг эътирофига сазовор бўлган Музаффар Саъдуллаев ҳам актёрликни тарк этган. У ҳунармандчилик ва медиа маҳсулотларини ишлаб чиқариш билан шуғулланади.
Шерзод Саидалиев
Шерзод Бин тахаллуси билан томошабинларга яхши таниш бўлган актёр Шерзод Саидалиев бир неча йилдан буён АҚШда яшайди. У аллақачон санъатни тарк этганини маълум қилган. Собиқ ижодкор аввалига нонвойлик билан шуғулланди, ҳозир эса трак ҳайдовчиси бўлиб ишлайди.
Муборак Ашурбоева
“Паноҳ” фильмидаги роли билан томошабинларга яхши таниш бўлган актриса Муборак Ашурбоева ҳам оила қургач, санъатдан кетган. У уй бекаси ва бир қучоқ фарзандларнинг онаси.
Фаррух Соипов
Актёр Фаррух Соипов ҳам санъатдан кетган. Бир муддат диний лойиҳаларни тайёрлашда иштирок этаётганди. Ҳозир айнан қайси соҳада фаолият юритишини маълум қилмаган.
Юсуфхон Нурматов
Хушовоз хонанда бир неча йилдан буён АҚШга серқатнов бўлиб қолганди. Март ойи аввалида эса яхши трак билан шуғулланувчи фирма излаётганини ва эндиликда ҳайдовчи сифатида фаолият юритишини маълум қилди.
Бону
“Қора тун” ва “Афсона” қўшиқлари билан машҳурликка эришган Бону ҳам аллақачон санъатни тарк этган. Унинг ҳаёти билан боғлиқ миш-мишлар кўп, аммо собиқ ижодкор бирорта интервьюсида бу ҳақда гапирмаган. Бизга маълум бўлгани шуки, у ҳисобчи бўлиб, хусусий фирмада ишлайди.
Изоҳ (0)