Кичик ёшида катта ёшдаги актёрлар учун ҳам орзу бўлган машҳурликни қўлга киритган болакайлар ўзбек киносида ҳам топилади. Журналист Наргизахон Муродова томошабинлар кўнглидан жой олган машҳур “болалар”нинг санъат оламига кириб келиши ва айни кунларда нималар билан бандлигига қизиқди.
“Мафтунингман”даги Муҳаббат
Муҳаббат Тўлахўжаева — Ўзбекистон халқ шоири Туроб Тўланинг фарзанди. У суратга тушган “Мафтунингман” фильми ҳам айнан шоирнинг қаламига мансуб сценарий асосида суратга олинган. Муҳаббатнинг фильмда суратга тушишини ундан ҳам кўра кўпроқ яқинлари хоҳлашган. Унинг укаси Нозим Тўлахўжаев — машҳур актёр. Муҳаббат актриса бўлмаса-да, у Ўзбекистондаги энг кўзга кўринган театршунослардан бири. Санъацҳунослик фанлари доктори бўлган Муҳаббат Тўлахўжаева бир неча йилдан буён Ўзбекистон давлат санъат ва маданият институтида талабаларга сабоқ беради.
“Абдуллажон” фильмидаги бош қаҳрамон
Шуҳрат Қаюмов таниқли оператор Темур Қаюмовнинг фарзанди ҳисобланади. У кинодаги илк ролини “Абдуллажон” фильмида яратган. Режиссёр Зулфиқор Мусоқов “Ўзбеккино” ҳовлисида Темур Маликовнинг ўғлини учратиб қолади. Мана шу тасодифий учрашув сабаб Абдуллажон роли Шуҳрат Қаюмовга насиб этган. У “Абдуллажон”дан сўнг бошқа ўзбек фильмларида суратга тушмади. Мактабни тамомлагач, Тошкент ирригация ва қишлоқ хўжалигини механизациялаш муҳандислари институтида таҳсил олди. 1998 йилда тажриба ошириш мақсадида чет элга кетган ва бир неча йил Қозоғистон ва Россияда яшаган. У Россияда суратга олинган лойиҳаларда оператор сифатида ишлаган. 2003 йили Ўзбекистонга қайтиб, ўз компаниясига асос солган. Унинг компанияси кинотехникаларни сотиш ва ижарага бериш билан шуғулланади. Оилали, 2 ўғил ва бир қизнинг отаси.
Жалол Юсупов 15 йилдан буён АҚШда
Жалол Юсупов — “Суюнчи” ва “Чинор остидаги дуэл” фильмларидаги эпизодик роллари билан яхши таниш. Аммо у илк марта 1978 йили режиссёр Аҳрор Акбархўжаев суратга олган “Шаффоф калитчалар” болалар фильмида Али ролини ижро этган. Бир йилдан сўнг машҳур режиссёр Мелис Абзаловнинг “Чинор остидаги дуэл” фильми учун ўтказилган кастингда иштирок этади. Бу фильм “Суюнчи” фильмида суратга тушишига асос бўлади. У аввал актёрлик, ундан сўнг режиссёрлик соҳаси бўйича таҳсил олган. Актёр шу кунгача “Сардор”, “Бахт учун миллион”, “Қасос”, “Аросат” ва “Алданган аёл” сингари кўплаб кино ва сериалларда ҳам суратга тушган. У 1991–2006 йилларда Ўзбекистон ёшлар театрида актёр ва режиссёр сифатида фаолият юритган. Ундан сўнг оиласи билан Нью Йорк шаҳрига кўчиб ўтган.
“Кичкина табиб”даги яширилган сир...
Болалигидан қўшиқчи бўлишни ният қилган Дилшодбек Каттабеков кутилмаганда актёрлик соҳасига қадам қўйган. Беш ёшидан бошлаб давлат тадбирларида иштирок этиш учун Тошкентга келган Дилшоднинг яқинларига “Кичкина табиб” фильмининг кастингида иштирок этишни таклиф қилишади. Дониёр ролига талабгорлар ниҳоятда кўп бўлган.
Юздан ортиқ иштирокчилар орасидан танлаб олинган Дилшодбек Каттабеков кино оламига дадил қадамлар билан кириб келди. Баъзи маълумотларда актёр ўша пайтда 5 ёшда бўлгани айтилади, бизнинг ҳисоб-китоблар эса Дилшодбек Каттабеков “Кичкина табиб” фильмида 8 ёшида суратга тушганини тасдиқлайди.Дилшодбек Каттабеков Ўзбекистон давлат санъат ва маданият институтининг бакалавр ва магистратура босқичларида таҳсил олган. “Муҳаббат синовлари”, “Хавфли бурилиш”, “Виждон” ва “Фидойилар” каби қатор фильмларда муваффақиятли ролларни ижро этган. Айни кунларда диний-ахлоқий роликларга режиссёрлик қилмоқда.
“Кичкина табиб”даги Нигора АҚШда оила қурган
Барно Нишонова “Кичкина табиб” фильмидаги Нигора роли билан томошабинларга яхши таниш. Аммо унинг ролга қандай тасдиқлангани ҳақида ҳеч қандай маълумотга эга эмасмиз. Боиси у анча йиллардан буён АҚШда оиласи билан яшайди.
Ўзбекистонда хизмат кўрсатган ёшлар мураббийи Мунаввар Абдуллаеванинг берган маълумотларига кўра, Барно Нишонова фортепиано йўналиши бўйича таҳсил олган ва бир муддат Ўзбекистон давлат санъат ва маданият институтида ҳам ишлаган. Унинг турмуш ўртоғи ҳам мусиқа билан шуғулланади. Улар болаларга фортепиано чалиш бўйича сабоқ беришади. Барно Нишонованинг икки нафар қизчаси бор.
Хадича Имомназарова операни танлаган
Хадича Имомназарова хусусий фильмлардаги катта-кичик роллари билан томошабинларга яхши таниш. У илк ролини 2007 йил суратга олинган “Зумрад ва Қиммат” фильмида ижро этган. Ундан сўнг “Нортой”, “Ошиқлар” ва “Мен юлдузман” каби фильмларда суратга тушган. Аммо у актриса бўлишни истамади ва академик хонандалик йўналишини танлади. У бир неча йилдан буён опера ижрочилиги билан шуғулланади. 2019 йилда “Ниҳол” номидаги давлат мукофотини ҳам қўлга киритган.
“Чол ва набира”даги Ғанишерни негадир ролларга чақиришмаяпти
Маъруф Шарипов “Чол ва набира” фильмидаги Ғанишер роли билан томошабинларга яхши маълум. Болаликдан қўшиқ айтишга қизиққан Маъруф бобоси сабаб “Томоша” гуруҳига қатнайди. Бир куни машғулотга “Ўзбеккино”дан бир гуруҳ ижодкорлар келиб, 5-6 ёшдаги болалар билан суҳбатда бўлишади. Чунки драматург Рихсивой Муҳаммаджонов илк режиссёрлик иши — “Чол ва набира” фильмини суратга олиш ниятида эди. Маъруф Шарипов кастингдан ўтиб, 6 ёшида Пўлат Саидқосимов билан суратга тушади. Ундан сўнг “Энагалар”, “Умид” ва “Тубанлик” каби фильмларда кичик ролларни ижро этди. 19 ёшни қаршилаган Маъруф Шарипов яхши ролларга чақиришмаётганини, агар шундай таклиф бўлса, яна фильмларда суратга тушишини маълум қилди.
Изоҳ (0)