20 ноябрь куни Ўзбекистон драма театрининг 56-мавсум очилиши маросими тантанали тарзда ўтказилди. Унда кўплаб устоз санъаткорлар, театр актёрлари, шаҳар аҳли ва хорижий меҳмонлар қатнашди. Маросим аввалида театр тарихига оид видеоролик намойиш этилиб, узоқ йиллардан буён юзлаб актёр-актрисаларни етиштириб чиқараётган бу маскан ҳақида нутқ сўзланди.
“Театр — ибратхона. Унга ёлғиз эмас, оилавий келиш керак, — дейди очилиш маросимига ташриф буюрган сўз устаси Зокир Очилдиев. — Фарзандларни бу маскан билан ошно қилиш лозим, ота-она айтадиган фикрни театр таъсирлироқ қилиб етказади. Ёзилмаган бир қоида бор — театрга спектакл бошланишидан 30-40 дақиқа аввалроқ келиб шу муҳитга мослашиш керак. Театр телефонда гаплашадиган ёки ғийбатлашиб ўтирадиган жой эмас. Шундагина бу даргоҳдан маънавий озуқа олиб кетса бўлади. Бир марта келсангиз бас, яна қайта қандай келганингизни билмай қоласиз — театр инсонни шундай сеҳрлаб қўяди”.
Очилиш маросимида Уилям Шекспир асари асосида драма театрининг бош режиссёри Олимжон Салимов томонидан саҳналаштирилган “Ромео ва Жулетта” спектакли намойиш этилди.
Дунё саҳналарида энг кўп кўрсатилган песалар сафига кирган ва ўзбек тилига шеърий услубда таржима қилинган дурдона асар шундай бошланди:
“…Шу бахтсиз ёшларнинг муҳаббатини,
Ўжар хонадонлар адоватини,
Аламли севгининг мусибатини,
Кўрсатиб берамиз сизга бу оқшом”.
Ушбу мавсум барча театр санъати ихлосмандларини ёрқин спектакллар ва унутилмас ҳиссиётлар билан кутиб олади.
Эслатиб ўтамиз, президент Шавкат Мирзиёев 22 ноябрь куни маданият ва санъат соҳасини ривожлантириш, хусусан, театрларнинг жамият маданий ҳаётидаги аҳамиятини ошириш ва улар фаолиятини янада қўллаб-қувватлашга оид таклифлар тақдимоти билан танишганди. Унга кўра, 2025-2030 йилларда театрларда “Миллий қаҳрамон” ва “Инсон қадри учун” мавзуларида 32 та туркум спектакллар яратиш ҳамда театр драматурглари учун Маҳмудхўжа Беҳбудий, ёш режиссёрлар учун Баҳодир Йўлдошев номидаги мукофотларни таъсис этиш, “Нигоҳ” ижодий лойиҳасини йўлга қўйиш, миллий академик мусиқа санъати бўйича композиторлар танловини ўтказиш таклиф этилган.
Изоҳ (0)