Дунё бўйлаб қурол-яроғ савдоси ҳажми 2024 йилда Совуқ уруш тугаганидан бери энг юқори даражага етди. Бу ҳақда Жаҳон қурол-яроғ савдоси таҳлили маркази томонидан эълон қилинган ҳисоботда маълум қилинди.
Марказ маълумотларига кўра, 2023 йилда глобал қурол-яроғ савдоси ҳажми 96,889 миллиард долларни ташкил қилган бўлса, 2024 йилда бу кўрсаткич 111,6 миллиард долларга етди. Таққослаш учун:
- 2021 йилда – 82,942 миллиард доллар
- 2022 йилда – 106,185 миллиард доллар
Экспертларнинг фикрича, қурол-яроғ экспорти ва импортининг сезиларли ошишига бир неча омиллар сабаб бўлган. Энг асосий омиллардан бири – Украинадаги уруш ва унинг атрофидаги геосиёсий вазият. Ғарб мамлакатлари Украинага катта миқдорда қурол етказиб бергани сабабли ўз ҳарбий захираларини тўлдиришга мажбур бўлди. Шу билан бирга, улар янада замонавий ва қимматроқ қуролларни сотиб олишга киришди
Ҳисоботга кўра, бу жараёнда энг катта фойда кўрган давлат – АҚШ бўлиб, у НАТОга аъзо мамлакатларнинг қурол бозорини деярли ўз назоратига олди.
Шунингдек, 2022 йилда оддий қуролларнинг глобал экспорт ва импорт ҳажми аввалги йилга нисбатан 28 фоизга ошгани қайд этилган. Бу ўсиш Украинадаги можаронинг давом этиши ҳамда уруш бошида тузилган қисқа муддатли шартномаларнинг амалга оширилиши билан боғлиқ.
2023 йилда эса бу кўрсаткич 2021 йилга нисбатан 16,8 фоизга ошган. Мутахассислар буни 2022-2023 йилларда қисқа муддатли қурол етказиб бериш шартномалари бажарилгани, узоқ муддатли келишувлар эса ҳали амалга оширилиш босқичида эканлиги билан изоҳлашмоқда.
Изоҳ (0)