АҚШ президенти Дональд Трампнинг махсус элчиси Кит Келлог урушни тинч йўл билан ҳал этиш учун ярим йил кераклигини айтмоқда. Бу ҳақда The Moscow Times хабар берди.
Дастлаб Трамп президентликка киришгач 24 соат ичида урушни тугатишга ваъда берганди. Келлог шундан сўнг президент 2024 йил охиригача урушни тўхтатиши мумкинлигини айтган. Бироқ кейинроқ бу муддатни 100 кунга чўзган. Эндиликда эса у яна янги муддатни эълон қилмоқда.
Мен барча томонларни жалб қилиш учун ошкора равишда 180 кунни оламан, деди Келлог.
У Украинадаги уруш 2025 йилдаёқ якунига етишини таъкидлади. Сиёсатчи АҚШнинг урушаётган томонлар ўртасида воситачи бўлишини, Европа эса музокараларда иштирок этмаслигини таъкидлади.
Мен муҳим маълумотларни тўплаш учун шу ердаман. Мен дипломатман. Музокаралар столида украинлар ва руслар — америкаликлар эса воситачи сифатида бўлади, таъкидлади Келлог.
У АҚШ томонидан Украинани қўллаб-қувватлаш давом этишини таъкидлади.
Аммо ҳозир қотилликларни зудлик билан тўхтатиш керак, дея қўшимча қилди сиёсатчи.
“Трамп буни тўхтатмоқчи”, деб таъкидлаб ўтди махсус вакил. У, шунингдек, Трамп Украина манфаатларини эътиборсиз қолдирмаслигини, шунинг учун “заиф келишув” бўлмаслигини айтди.
Келлог жараённи тезлаштириш учун музокаралар икки йўналишда — Россия ва Украина-иттифоқчилар йўналишида олиб борилаётганини билдирди. У Америка—Украина—иттифоқ йўналишида ишлаши, Россия томони билан эса АҚШ президентининг Яқин Шарқ бўйича махсус вакили Стив Уиткофф шуғулланишини таъкидлади.
Изоҳ (0)