АҚШ президенти Дональд Трамп нима сабабдан Россия Украинага қарши кенг кўламли уруш бошлагани сабабини айтди. Бу ҳақда “Европейская правда” хабар берди.
Трампнинг сўзларига кўра, собиқ президент Жо Байден Украинанинг НАТОга аъзо бўлиш истиқболлари ҳақида гапирган. Бу эса гўёки “Россияни кенг кўламли ҳарбий босқинни бошлашга ундаган”. АҚШ президенти россияликлар ўзларининг “мавқеи” туфайли Украинанинг НАТОга тўлақонли аъзоси бўлишига “йўл қўя олмаслиги”ни айтди. Бироқ қандай “мавқеи” ҳақида гап кетаётганига изоҳ бермади.
Россиядай мавқеига эга бўлган давлат уларга (украиналикларга.) НАТОга аъзо бўлишга қандай рухсат беришини тушунмаяпман.. Улар бундай мавқе билан Украина альянсга қўшилишига рухсат бера олишмас эди, деди президент.
Сиёсатчи таъкидлашича, Россия узоқ вақтдан бери Украинанинг НАТОга қўшилиши эҳтимоли ҳақида “қатъий” бўлган, аммо “Байден чиқиб, Украина Иттифоққа қўшилиши мумкинлигини эълон қилган”.
У шундай қилиши биланоқ, мен: Энди уруш бўлади дедим ва ҳақ бўлиб чиқдим, дея таъкидлади АҚШ раҳбари.
Трампнинг даъвосига кўра, ўша пайтда президент бўлганида Россиянинг Украинага қарши кенг кўламли уруши “ҳеч қачон юз бермасди”.
АҚШ президенти Путин ва Зеленский билан телефонда суҳбатлашди
Трамп 12 февраль куни дастлаб россиялик ҳамкасби Владимир Путинга қўнғироқ қилган. Томонлар Украинадаги уруш, Яқин Шарқ, энергетика, сунъий интеллект ва доллар таъсири ҳақида гаплашган. Россия президенти Трампни Москвага таклиф қилган ва Украина масаласини ҳал қилиш учун Америка расмийларини қабул қилишга тайёрлигини айтган. Трамп эса улар ўртасидаги учрашув Саудия Арабистонида бўлишини айтмоқда.
Украина раҳбари эса америкалик ҳамкасби билан суҳбат тафсилотларини қуйидагича изоҳлаган:
Тинчликка эришиш имкониятлари ҳақида узоқ гаплашдик. Ҳеч ким Украинадан кўра кўпроқ тинчликни хоҳламайди. АҚШ билан биргаликда Россия агрессиясини тўхтатиш ва барқарор тинчликни таъминлаш устида кейинги қадамларимиз харитасини белгиламоқдамиз, бўлажак учрашувларни режалаштирдик, деди Зеленский.
Украина президентига кўра, суҳбатда Трамоп Путин билан нималарни муҳокама қилганини ҳам айтган. Бироқ бунга аниқлик киритмаган.
Трамп нега биринчи Путинга қўнғироқ қилди?
АҚШ президенти россиялик ҳамкасбига биринчи бўлиб қўнғироқ қилгани муҳокамаларга сабаб бўлди. Трамп бунга қуйидагича муносабат билдирмоқда:
Баъзилар аввал Зеленскийга қўнғироқ қилишим керак эди, дейишмоқда. Бундай деб ўйламайман. Биз Россия келишув тузишни хоҳлаётгани ёки йўқлигини аниқлашимиз керак эди. Зеленский келишув тузмоқчи эканини биламан, чунки у менга шундай деган. Аммо энди Россия ҳам буни хоҳлаётганини билиб олдим, дея изоҳ берди АҚШ президенти.
Изоҳ (0)