Африка иттифоқи ҳукуматлар ва халқаро ташкилотларда XVI асрда яратилган Меркатор харитаси ўрнига Африка қитъасининг ҳақиқий ҳажмини кўрсатадиган янги проексиядан фойдаланишни тарғиб қилмоқда. Бу ҳақда The Guardian хабар берди.
“Африка иккинчи энг катта қитъа, у миллиарддан ортиқ аҳолига эга. Аммо Меркатор харитаси уни кичикдек кўрсатиб, нотўғри тасаввур уйғотади. Қитъада 55 дан зиёд давлатлар мавжуд”, деди Африка иттифоқи комиссияси раис ўринбосари Селма Малика Ҳаддади.
Танқидчилар фикрича, бу стереотиплар таълим, ОАВ ва сиёсатга ҳам таъсир қилади. Шу боис “Cоrrеct thе Маp” (“Харитани тўғрилаш”) ташаббуси “Аfrica no Filter” ва “Speak up Afrika” ташкилотлари томонидан илгари сурилган бўлиб, унда 2018 йилда яратилган “Equal Earth” проексиясини глобал стандарт сифатида қабул қилиш таклиф этилмоқда.
“Африканинг харитадаги ўлчами нотўғри. Бу тарихдаги энг узоқ вақт қўлланиб келинган нотўғри маълумот. Энди бунга барҳам бериш вақти келди”, деди “Аfrica no Filter” раҳбари Моки Макура.
“Speak up Afrika” ҳаммуассиси Фара Ндиае эса Меркатор харитаси африкаликларнинг, айниқса, мактаб ёшидаги болаларнинг ўзига ишончига салбий таъсир қилаётганини билдирган. У “Equal Earth” проексиясини Африка таълим дастурларига киритиш устида иш олиб бораётганини айтмоқда. Африка иттифоқи бу ташаббусни қўллаб, уни қитъанинг глобал майдондаги “ҳақиқий ўрнини қайта тиклаш” мақсади билан уйғун деб ҳисоблайди. Ташкилот яқин вақт ичида аъзо давлатлар билан муҳокама қилиб, янги харита проексиясини кенг жорий этиш бўйича чоралар кўришини билдирган.
Меркатор харитаси дунё бўйлаб ҳануз кенг қўлланилади. Google Maps компьютерда 2018 йилдан 3D глобусга ўтгани билан, мобил иловада Меркатор ҳамон асосий вариант бўлиб турибди.
“Speak up Afrika” компанияси Жаҳон банки ва БМТ каби йирик ташкилотлардан ҳам “Equal Earth” харитасини қабул қилишни сўрамоқда. Айни пайтда, Жаҳон банки аллақачон Меркатордан воз кечаётганини маълум қилган, БМТ эса масалани экспертлар қўмитасида кўриб чиқишини билдирмоқда. Кариб денгизи давлатлари ҳам Африка иттифоқининг бу ташаббусини қўллаб-қувватлаб, Меркатор харитасини “куч ва ҳукмронлик мафкураси рамзи” сифатида рад этишга чақирмоқда.
Маълумот ўрнида, Африка Иттифоқи 2002 йилда ташкил топган (1999 йилда тугатилган Африка бирдамлик ташкилоти — ОАУ ўрнида тузилган). Штаб-квартираси Аддис-Абебада жойлашган. Унга 55 та давлат аъзо (бутун қитъа давлатларини қамраб олади). Иттифоқнинг мақсади қуйидагилардан иборат:
- Африка мамлакатлари ўртасида сиёсий, иқтисодий ва ижтимоий интеграцияни кучайтириш;
- қитъада тинчлик ва хавфсизликни таъминлаш;
- инсон ҳуқуқлари ва демократияни ривожлантириш;
- Африка давлатларининг глобал майдондаги овозини мустаҳкамлаш.
Изоҳ (0)