АҚШ президенти Дональд Трамп 15 август куни Хитой раҳбари Си Цзиньпин Тайванга бостириб кирмасликка ваъда берганини маълум қилди. Бу ҳақда Arab News хабар берди.
Трамп Хитой ва Тайван ўртасидаги муносабатларни Украина-Россия вазиятига қиёслаб, шундай деди:
“Хитой ва Тайван билан боғлиқ вазият Россия ва Украинадаги ҳолатга ўхшайди. Лекин мен президент эканман бундай бўлишига йўл қўймайман. Си менга: “Сиз президент экансиз мен бундай қилмайман”, деди. Мен эса буни қадрлайман”.
Президентнинг қўшимча қилишича, Си Цзиньпин Трампга ўзининг сабрли одам эканини, шу билан бирга, Хитой ҳам сабрли давлат эканини айтган. Хитой Тайванни ўз ҳудуди деб билади ва зарур бўлса, куч ишлатиб бўлса ҳам уни мамлакатга “қайта бирлаштириш” ниятида эканини яширмай келади. Тайван эса бу даъволарни қатъиян рад этади. Вашингтондаги Хитой элчихонаси 15 август куни Тайван масаласини “Хитой-АҚШ муносабатларидаги энг муҳим ва нозик масала” эканини билдирган.
“Қўшма Штатлар ъягона Хитойъ принципига ва учта Хитой-АҚШ қўшма коммюникесига амал қилиши, Тайванга оид масалаларда эҳтиёткорлик билан ёндашиши ва Тайван бўғозида тинчлик ҳамда барқарорликни сақлаши лозим”, деди элчихона вакили Лю Пенгю.
АҚШ раҳбари ва Си Цзиньпин, Трампнинг иккинчи президентлик муддати бошланганидан бери, илк бор июнь ойида телефон орқали мулоқот қилган эди. Улар апрель ойида ҳам телефон орқали суҳбатлашган, бироқ санаси очиқланмаган. Қўшма Штатлар Тайваннинг асосий қурол-яроғ етказиб берувчиси ва халқаро ҳамкори бўлиб қолмоқда. Бироқ кўпчилик давлатлар сингари, Вашингтоннинг ҳам Тайван билан расмий дипломатик алоқалари мавжуд эмас.
Изоҳ (0)