2024 йилда Ички ишлар вазирлиги тизимида фаолият юритувчи 300 нафарга яқин “участкавой” тизимдан ҳайдалган, 100 нафарга яқини лавозимидан бўшатилган. Бу ҳақда 14 март куни АОКАда бўлиб ўтган матбуот анжуманида вазирликнинг Ҳуқуқбузарликлар профилактикаси хизмати бошлиғи ўринбосари Раҳимжон Наимов маълум қилди.
Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати масъуллари иштирокида президентнинг “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ижросига бағишланган матбуот анжуманида соҳада амалга оширилаётган ишлар ҳақида маълумот берилди.
Матбуот анжуманида сўз олган “Дарё” журналисти соҳа масъулларига юзланиб, “Ҳуқуқбузарликлар профилактикасида асосий масъулиятни олиши керак бўлган профилактика инспекторларининг метан заправкаларда ўзга шахсларга зўравонлик қилиб, “ундай қиламан, бундай қиламан” дея ваколатидан фойдаланиши, ваколатини суиистеъмол қилиши каби ҳолатлар учраяпти.
Энг ачинарлиси уларнинг бошқа бир фуқаронинг турмуш ўртоғи билан қўлга тушиб қолиши каби воқеалар учраши уларга нисбатан кескин чора кўрилмаётганиданми? Ёки чора кўрилса ҳам бу ҳақда жамоатчиликка ошкор этилмаётганиданми? Уларга бу ҳаракати учун қандай чоралар кўрилмоқда?”, дея савол берди.
Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати бошлиғи ўринбосари Раҳимжон Наимовнинг маълумот беришича, профилактика инспекторларининг нопоклиги, билимсизлиги, фуқаролар билан қўпол муносабатлари сабаб 2024 йилда уларнинг уч юзга яқини тизимдан ҳайдалган, 100 га яқини лавозимидан бўшатилган.
Ҳар бир тизимда бундай нопок ходимлар бор деб ўйлайман. 2024 йилда юртбошимиз раислигида ўтказилган селекторда профилактика инспекторлари томонидан кўплаб хато-камчиликлар ўтаётганлиги, Ватанга садоқати камайиб кетганлиги ва қинғир-қийшиқ, нопок ишларга аралашиб қолганлиги бўйича қаттиқ эътироз бўлганидан сўнг ички ишлар вазири фармойишига асосан 2024 йилнинг октябрь ойидан бошлаб республика бўйича навбатдан ташқари аттестация ўтказилди.
Айнан шу аттестацияда тизимнинг юзини ерга қаратадиган, тизимга доғ туширадиган, билим савияси паст, фуқаролар билан қўпол муносабатда бўлганлар билан суҳбат ўтказилиб, 300 га яқин профилактика инспекторлари ички ишлар сафидан бўшатилди, 100 га яқини лавозимидан олинди, дейди масъул.
Раҳимжон Наимовнинг қўшимча қилишича, метан заправкадаги зўравон ИИБ ходими ва бошқа эркакнинг турмуш ўртоғи билан қўлга тушиб каби ҳолатлар 2024 йилда содир бўлган воқеалар бўлиб, тозалаш ишларидан сўнг 2025 йилнинг ўтган даври мобайнида бундай воқеалар рўй бермаган.
Изоҳ (0)