Қашқадарё вилоятининг Деҳқонобод туманида профилактика инспектори ва Миллий гвардия ходимлари 60 ёшни қаршилаган қарияни уриб ўлдиргани ҳақида хабар тарқалди. Ижтимоий тармоқларда тарқалган видеода деҳқонободлик қария қизи чақирган ИИБ ходими ва Миллий гвардия сафдори томонидан аёвсиз калтаклангани тилга олинган.
«Дарё» мухбири Отабек Қўлдошев воқеа тафсилотларини ўрганиш мақсадида Деҳқонобод туманида бўлди.
ИИБ ходими ва Миллий гвардия сафдори томонидан калтакланиб ўлгани айтилган фуқаро туманнинг «Истиқлол» маҳалласида яшовчи 53 ёшли Тўрақул Каримов бўлиб, 2020 йилнинг 10 август куни тахминан соат 01:00 да вафот этган.
«2020 йилнинг 31 июль куни соат 19:00 да уйимизга поччам Азамат Отақулов келди. Уйда дадам ва мен бор эдик. Онам акамникига кетганди. Уйда ёлғиз бўлганим учун қўрқдим ва поччам билан аммамнинг Ўлмасой ва Ғулом исмли фарзандларини олиб келдик. Поччам ва дадам байрамни нишонлаб ўтиришди. Кеч бўлгач, дадам музлатгичда турган бир шиша ароқни олиб ичди. Поччамга узатди, лекин поччам ичмади. Соат кечки 11 дан ўтгач, поччам кетаман деди. Дадам поччамга ‘анчадан бери келмагандинг, яхши ўтирибмиз кетма’ деди. Дадамнинг овози баландлагач, поччам билан уришиб қолмасин деб, Мухтор исмли профилактика инспекторини телефон қилиб чақирдим. Бироз ўтгач, ‘Тўра, Тўра’ деб, кимдир кириб келди. Мен чарчаганим боис, ўрнимдан туролмадим. Кейин бироз ўтгач, тапур-тупур овозни эшитиб, ташқарига чиқдим. Чиқсам, дадам ерда ётган экан. Усаткавой урган. Жияним Ўлмасой ўша ерда тик турган экан», — дейди марҳум Тўрақул Каримовнинг қизи Ойниса Каримова.
Марҳум Тўрақул Каримовнинг қизи Ойниса Каримова билан 2020 йил 10 август куни туман ИИБ масъул ходими ҳамда яқин қариндоши иштирокида суҳбат қилинганда у отасини профилактика инспектори урмаганлигини, отаси ва поччаси биргаликда олти шиша спиртли ичимлик истеъмол қилганини айтган бўлса-да, кейинчалик фикрини ўзгартирган.
Марҳумнинг қизи фикрини ўзгартиришига қўрқитилганини сабаб қилиб кўрсатмоқда.
«Участкавой ўша куни кечки пайт уйимизга яна қайтиб келиб, дадамни тинчландими деб сўради. Мен дадам тинчланганини, аммо нега уришганининг сабабини сўрадим. Шунда у менга ‘агар бугунги воқеани бировга айтсанг, сени иш жойингдан бўшатаман, дадангни қаматиб юбораман’ деб қўрқитди. Мен қўрқиб кетганим учун, бу ҳақда ўша пайт ҳеч кимга айтмадим. Ва усчаткавой талабига кўра, дадамга ‘Мухтор сизни урмади-я’ деб овоз ёзиб бердим», — дейди Ойниса Каримова.
Ойниса Каримованинг айтишича, Мухтор исмли профилактика инспектори ўша куни уйга кириши билан дадасини урган. Бироқ у профилактика инспекторининг дадасига қўл кўтарганини кўрмаган. Аммо шовқинни эшитган ва шундай хулоса қилган.
«Дадам ерда ётгани учун, профилактика инспектори дадамни урган деган хулосага келдим. Ўша ерда турган жияним эса, участкавой дадамни урганини кўрган», — дейди марҳумнинг қизи.
«Икки нафар ИИБ ходими ‘Тўра, Тўра’ деб чақириб, уйга кириб келишди. Ўша пайтда тоғам раҳматли ва поччам ўтиришганди. ‘Участкавой’лар нима қиляпсиз деб кириб келгач, тоғам ‘ўтирибман, уйда меҳмон бор’ деди. Шунда улар тоғамнинг қўлидан тортиб, олиб кетишга уринишди. Поччамнинг кўзи илинган экан шекилли, участкавой тоғамни урганини кўрмай қолди. Аммо мен ‘участкавой’ тоғамнинг юзига шапалоқ тортганини кўрдим», — дейди воқеа гувоҳи Ўлмасой Ўринова.
Марҳумнинг қизи ва жиянининг айтишича, чақирувга асосан Тўрақул Каримов хонадонига борган профилактика инспекторлари — Мухтор Қурбонов ҳамда Алишер Ашуровлар Тўрақул Каримовнинг қўлини қайириб, ҳовлидан кўчага олиб чиққан.
«Кўчага олиб чиқилган тоғам бироз вақтдан сўнг бақириб юборди. Поччам, опамга (Ойниса Каримова назарда тутилмоқда. Таҳририят) ‘бор қара, дадангни уришди’, деди. Опамнинг оёғида нуқсони борлиги сабаб, оқсоқланиб, кўчага чиқди. Кейин мен ва поччам ортидан бордик. Борсак, тоғам биқинини ушлаганича, ерда ётган экан», — дейди Ўлмасой Ўринова.
Ойниса Каримова ҳамда Ўлмасой Ўринова профиликтика инспекторлари марҳум Тўрақул Каримовга ҳовлидан ташқарида қўл кўтарганини кўрмаганини, аммо бақирган овозидан калтакланган деган хулосага келганини маълум қилди.
«Мен профиликтика инспекторини чақириб, дадамни тинчлантириб беринг дегандим. Улар эса дадамни уришди», — дейди марҳумнинг қизи.
Марҳумнинг яқинлари тақдим этган видеода профилактика инспекторлари чақирувга асосан хонадонга келганини, хонадон ичкарисига кириб кетгач, бироз ўтиб қайтиб чиққанини илғаш мумкин. Воқеа жойи қоронғи бўлгани боис, кузатув камерисидаги ҳолат ғира-шира кўринган. Видеодаги воқеани изоҳлаган марҳумнинг яқини Шуҳрат Каримов бу пайтда амакиси калтакланганини тахмин қилмоқда.
«Видеода профилактика инспекторлари амакимни уйидан олиб чиққани, олиб чиқиши давомида автомобилининг олдига олиб боргунича уриб келганини кўриш мумкин, — дейди марҳумнинг қариндоши Шуҳрат Каримов. — Амаким ‘участкавой’лардан бирининг оёғидан ушлаб, туришга ҳаракат қилган. Тургач, бири уни урган. Мувозанатни йўқотган амаким, иккинчи инспекторга урилган. Хуллас, қоронғуда амаким роса калтакланган. Кейин қизи келиб уни олиб кетган».
«‘Участкавой’ ва унинг шериги амакимни роса калтаклаётган пайт кўчадан машина ўтиб қолган. Машина ёруғи тушгач, улар амакимни уришдан тўхтаган. Шу пайт қизи ҳам келиб қолган ва дадасини ичкарига олиб кирган. Аммо қоронғуда улар амакимни роса уришиб, аҳволини оғирлаштирган. Лекин бу ҳолатга ҳеч ким эътибор қаратмаяпти», — дейди Шуҳрат Каримов.
Марҳум яқинларининг шикоятига кўра, уларда ИИБ ходимларининг қотиллигини исботловчи видеолар бўлишига қарамасдан масъул ташкилот вакиллари сукут сақламоқда.
Шуҳрат Каримов айтган видеони «Истиқлол» МФЙ профилактика инспектори Мухтор Қурбонов бошқача изоҳлади.
«2020 йил 31 июль куни кечки пайт соат 11 дан ўтгач, 18-96 рақамидан менга қўнғироқ бўлди ва ‘Тўрақул Каримовнинг қизиман, уйимизда меҳмон бор, чиқариб юбориб, дадамни тинчлантириб беринғ деди. Айтилган манзилга етиб бордик. Борсак, Тўрақул ака ва меҳмони ўтирган экан. Тўрақул ака, ўзини билмас даражада маст эди. Шунда у кишига, ‘ака байрам куни ичиш шартмиди’ дедим. Ва қўлидан тутиб, кўчага олиб чиқишга ҳаракат қилдим. Тўрақул ака эса, мени ҳақорат қилиб кетди. Шунда шеригим Алишерга хонадон меҳмонини уйига кузатиб қўйиши лозимлигини айтдим. Тўрақул акани эса, олиб кетиш учун кўчага олиб чиқдик. Шунда Тўрақул аканинг қизи дадаси ўзига келганини айтиб, олиб кетмаслигимизни илтимос қилди. Ва оёғида туролмайдиган Тўрақул акани елкасига суяб, ичкарига олиб кирди. Кузатув камерасида мана шу воқеалар ёзилган», — дейди «Истиқлол» маҳалласининг профилактика инспектори Мухтор Қурбонов.
Воқеа содир бўлган куни Мухтор Қурбонов билан бирга бўлган қўшни ҳудуд — «Бўстон» маҳалласининг профилактика инспектори Алишер Ашуров ҳам Тўрақул Каримовнинг оёқда туролмас даражада маст бўлганини таъкидламоқда.
«Чақирувга асосан хонадонга бордик. Борсак, уйда бегона кишилар бор экан. Уларга уйига кетишлари лозимлигини айтиб, уйдан чиқариб юбордик. Хонадон эгасини олиб кетмоқчи бўлганимизда, у оёқда туролмайдиган даражада маст бўлганлиги сабаб юролмасдан, ерга ўтириб оларди. Шунга қарамасдан, Тўрақул Каримовни етаклаб, кўчага олиб чиқдик. Биз билан бирга кўчага чиққан қизи дадасини олиб кетмаслигимизни илтимос қила бошлади. Шундан сўнг, кўчага олиб чиқилган Тўрақул Каримовни ортга қайтардик. Сўнгра Мухтор Қурбонов мени уйимга ташлади.Ундан кейинги воқеалардан бехабарман», — дейди Алишер Ашуров.
«Дарё» мухбири билан суҳбатлашган Деҳқонобод туман ИИБ бошлиғи ўринбосари Дилшод Мирзаевнинг маълумот беришича, фуқаро Тўрақул Каримов дастлаб 2020 йил 2 август куни туман тиббиёт бирлашмасига соғлиғидан шикоят қилиб, мурожаат қилган ва уни ИИБ ходими калтаклаганини айтган. Шундан сўнг, ҳолат туман ИИБ XPБ катта инспектори Самариддин Беккамов томонидан ўрганилган.
Фуқаро Тўрақул Каримов ИИБ ходимлари билан суҳбат жараёнида гоҳ ‘профилактика инспекторлари калтаклади’ деса, гоҳ Миллий гвардия ходимларидан жабр кўрганини, яна бир гапида эса уни калтаклаганларни танимаслигини айтган. Ва профилактика инспектори Мухтор Қурбоновдан уни калтаклаган икки нафар Миллий гвардия ходимларини топиб беришини талаб қилган. Воқеалар ривожи бундай тус олганини кўрган ИИБ масъуллари ҳолатга аниқлик киритиш учун ишни туман прокуратурасига топширган.
«Туман тиббиёт бирлашмасидан қўнғироқ қилиб, фуқаро ИИБ ходими томонидан калтакланганини айтишганидан сўнг, мурожаатчи Тўрақул Каримов билан суҳбатлашдим. Ўшанда марҳум уни 2020 йил 1 август куни соат 10:30 да Миллий гвардия ходимлари калтаклаганини айтди. Ҳамда профилактика инспектори ўша Миллий гвардия ходимларини топиб беришини талаб қилди», — дейди Дилшод Мирзаев.
Деҳқонобод туман ИИБнинг маълумот беришича, профилактика инспекторлари Тўрақул Каримов хонадонидан кетганидан сўнг, хонадон эгалари кечаси соат 12:00 да тез ёрдам чақирган.
«Кечаси соат 00:07 да фуқаро Тўрақул Каримовнинг қизи Ойниса Каримова чақирувига кўра, ушбу хонадонга бордик. Бемор Тўрақул Каримов буйраги безовта қилаётганини айтиб, ёрдам сўради. Беморнинг айтишича, бу касаллик уни анчадан бери қийнаб келган. Беморга «Ношпа» укол қилдим. Унинг танасини кўздан кечирганимда, ҳеч қандай жароҳат ёки шиш изларини кўрмагандим», — деган тез ёрдам ҳамшираси Дилноза Назарова туман ИИБ билан суҳбати давомида.
«Хонадон эгалари 1 август куни соат 11:00 да ҳам тез ёрдам чақириб, Тўрақул Каримовнинг буйраги безовта қилаётганини билдирган. Тез ёрдам фелдшери Умарбек Тангировнинг айтишича, у ёрдамга келган пайтда Тўрақул Каримов маст бўлган», — дейди туман ИИБ бошлиғи ўринбосари Дилшод Мирзаев.
«Бемор маст бўлгани ва юзида ниқоби йўқлиги боис, ниқоб тақиб олишини сўрадим ва шундан кейин ёрдам кўрсатишимни айтдим. Бемор эса мени ҳақоратлади. Шунда маска тақмаса, Миллий гвардия ходимларини чақиришимни айтганимда, бемор ниқоб тақди. Бемор буйраги безовта қилаётганини айтгач, ёрдам кўрсатдик ва яна нима безовта қилаётганини сўрадик. У шикояти йўқлигини билдирди», — дейди Умарбек Расулов.
Туман тиббиёт бирлашмасининг шошилинч тез тиббий ёрдам бўлими бошлиғи Нормурод Умаровнинг маълумот беришича, марҳум Тўрақул Каримов дастлаб, 2020 йил 1 август куни соат 20:30 да шифохонага мурожаат қилган.
«Фуқаро Тўрақул Каримов бизга мурожаат қилиб, ИИБ ходимлари томонидан калтакланганини айтиб, тиббий ёрдамга муҳтожлигини, иккала биқин соҳасида оғриқ борлигини билдирди. У маст ҳолатда бўлишига қарамасдан, тиббий кўрикдан ўтказдик. Кўрик давомида унинг соғлиғида муаммо йўқлиги, кўкрак қафасидан шикоят қилмаганлиги, аммо иккала биқин соҳасида оғриқ борлиги ва шилинма жароҳат олганлиги маълум бўлди. Шу сабаб унга суд экспертизадан ўтиш тавсия қилинди», — дейди Нормурод Умаров.
Шифокорларнинг маълумот беришича, бемор 1 август куни шифохонада ётмасдан уйига қайтган. Эртаси куни соат 13:50 лар атрофида эса қизи Ойниса Каримова билан яна шифохонага мурожаат қилиб, нафас олишда қийналаётганини, кўкрак қафаси чап томонида шиш ва оғриқ борлигини билдирган. У тиббий текширувдан ўтказилганда, тўққизинчи қовурғада ёпиқ синиш, чапдан пневмоторакс тери ости эмфиземаси, яъни тери ости ҳаво йиғилиши борлиги маълум бўлган.
«Беморнинг қизи ва ўзи билан суҳбатлашганимизда жароҳат қачон ва қаерда орттирилганини билмаслигини маълум қилди», — дейди шифокор Марат Қурбонов.
Мутахассис шифокорларнинг маълумот беришича, инсон қовурғасида синиш кузатилганда беш соат муддат ичида кўкрак қафасининг тери қисмида ҳаво йиғилиши кузатилади. Аниқлик киритилишича, марҳумда қовурға синиши, 2020 йилнинг 2 август куни соат тахминан 14:00 да аниқланган.
Марҳумнинг акаси Жуманазар Каримовнинг айтишича, укасининг ўлимида профилактика инспекторларининг қўли бор.
«Улар укамнинг қизи чиқарувига кўра, уйига келиб, уни роса дўппослаган. Калтаклаб, жароҳат етказган ва уриб ўлдирган. Туман прокуратураси эса бунга эътибор қаратмаяпти. Кеча прокурор келди, ҳовлининг у ер бу ерини кўриб, яна қайтиб кетди», — дейди Жуманазар Каримов.
Деҳқонобод туман прокурори Лазиз Ҳамраевнинг «Дарё»га маълумот беришича, мазкур ҳолат юзасидан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган бўлиб, айни пайтда тергов-суриштирув ишлари олиб борилмоқда.
Мазкур ҳолатни ўрганиш давомида бир савол очиқ қолди. Марҳумнинг қовурғаси қачон ва қай тарзда синган? Деҳқонобод туман прокуратураси ҳолат бўйича, тез орада қўшимча маълумот берилишини маълум қилди.
Изоҳ (0)