«Чироқчи воқеаси» айбдорларига суд ҳукми ўқилди. Гаров эвазига очиқда қолган «участкавой»лар ҳам қамоққа олинди

«Чироқчи воқеаси» айбдорлари ишини кўриб чиққан Олий суд судьяси Камолиддин Толлибоев раислигидаги судлов ҳайъати марҳум Юсуф Абдураҳмонов ўлимида айбланганларга ҳукм ўқиди, дея хабар берди «Дарё» мухбири.

Маълум бўлишича, Чироқчи тумани ИИО ФМБ 4-сонли ИИБ бошлиғи лавозимида ишлаган Нурбек Овлаев 2 йил 6 ой ИИБ тизимида ҳамда бошқа мансабдорлик вазифаларида ишлаш ҳуқуқидан маҳрум қилиниб, 9 йил озодликдан маҳрум қилинган.

Чироқчи тумани ИИО ФМБ 4-сонли ИИБ жиноят қидирув гуруҳи тезкор вакили лавозимида ишлаган Анвар Жонқобилов ҳам 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, 8 йил 6 ойга озодликдан маҳрум қилинган.

Чироқчи тумани ИИО ФМБ 4-сонли ИИБ профилактика инспектори лавозимида ишлаган Шерзод Раҳмонов 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, унга 6 йил озодликдан маҳрум қилиш жазоси тайинланган.

Профилактика инспектори Адҳам Тожиноров ҳам 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, 5 йил 6 ойга озодликдан маҳрум қилинган.

Чироқчи тумани ИИО ФМБ 4-сонли ИИБ жиноят қидирув гуруҳи тезкор вакили лавозимида ишлаган Бобурмирзо Ғайратовга эса 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, 4 йил озодликни чеклаш жазоси тайинланган.

Прокурор Шаҳбоз Абдиевнинг Гўзал Абдиева фойдасига 52 миллион 750 минг сўм моддий ва маънавий зарарни ундириш тўғрисидаги сўрови жабрланувчининг қонуний вакили даъвосидан воз кечгани учун рад этилган.

Эслатиб ўтамиз, судда давлат айбловчиси сифатида иштирок этган Қашқадарё вилоят прокуратураси бўлим бошлиғи Шаҳбоз Абдиев суд музокарасида Чироқчи туман ИИО ФМБ 4-сонли ИИБ бошлиғи лавозимида ишлаган судланувчи Нурбек Овлаев ҳамда Чироқчи тумани ИИО ФМБ 4-сонли ИИБ жиноят қидирув гуруҳи тезкор вакили лавозимида ишлаган Анвар Жонқобиловлар 3 йил муддатга ИИБ тизимида ишлаш ҳуқуқидан маҳрум қилиниб, 10 йилга озодликдан маҳрум қилинишини сўраган эди.

Прокурор, шунингдек, марҳум Юсуф Абдураҳмонов истиқомат қилган ва мол ўғрилиги бўйича шикоятлар кўпайган Лангар қишлоғининг собиқ профилактика инспектори Шерзод Раҳмонов ҳам 3 йил муддатга ИИБ тизимида ишлаш ҳуқуқидан маҳрум қилиниб, 9 йил муддатга умумий тартибли колонияларда озодликдан маҳрум қилиш жазосини ўташини сўраган.

Давлат айбловчиси Адҳам Тожиноровнинг ҳам ИИБда ишлаш ҳуқуқи 3 йилга чекланиши ва 8 йил муддатга озодликдан маҳрум қилинишини, Лангар қишлоғидаги мол ўғрилиги бўйича Президент порталига қилинган мурожаатни ўрганиш мақсадида ушбу қишлоққа бориб, мурожаатчи номидан тилхат ёзган ва мурожаатни сохта ҳужжатлар билан ёпишга уринган Чироқчи тумани ИИО ФМБ 4-сонли ИИБ жиноят қидирув гуруҳи тезкор вакили лавозимида ишлаган Бобурмирзо Ғайратов ҳам 2 йил 6 ой муддатга ИИБ тизимида ишлашдан маҳрум қилиниб, 5 йил 6 ой муддатга озодликдан маҳрум қилинишини сўраганди.

Шаҳбоз Абдиев марҳумнинг қонуний вакили Гўзал Абдиева фойдасига 52 миллион 750 минг сўм моддий ва маънавий зарар ундирилиши лозимлигини ҳам таъкидлаганди. Гўзал Абдиева эса cуд ҳайъатидан судланувчилар — Нурбек Овлаев ҳамда Анвар Жонқобиловларни суд залидан озод қилишни сўраган эди.