Қозоғистонлик ҳужумчи Дастан Сатпаев УЕФА Чемпионлар Лигаси тарихида гол урган энг ёш футболчига айланди. 16 ёш-у 330 кунлик футболчи “Қайрат” сафида Словениянинг “Олимпия” клубига қарши кечган биринчи саралаш босқичи учрашувида гол уриб, тарихга кирди. Бу ҳақда Sports нашри хабар берди.
Сатпаев бу натижа билан аввалги рекордчи, “Барселона” ҳужумчиси Ансу Фатини ортда қолдирди. Фати Чемпионлар Лигаси тарихида илк голини 17 ёш-у 40 кунлигида урган эди.
Қизиқ томони шундаки, жорий йил февраль ойида Сатпаев Англиянинг “Челси” клуби билан шартнома имзолаган. “Аристократлар” уни “Қайрат”дан 4 миллион евро эвазига сотиб олган эди. У 18 ёшга тўлгач, расман Лондон клубига қўшилади.
Маълумот учун, Чемпионлар Лигаси биринчи саралаш босқичи доирасидаги “Олимпия” — “Қайрат” учрашуви 1:1 ҳисобида якунланди. Жавоб ўйини 15 июль куни Олмаотада бўлиб ўтади. Ғолиб жамоа кейинги босқичда Финляндиянинг “КУПС” ва Молдованинг “Милсами” жамоалари ўртасидаги жуфтлик ғолиби билан тўқнашади.
Эслатиб ўтамиз, жорий мавсум Еврокубок саралашида Қозоғистондан “Қайрат”дан ташқари “Актобе”, “Ордабаси” ва “Астана” жамоалари ҳам иштирок этмоқда.
Изоҳ (0)