Олий суд Алламжоновнинг 7 нафар ходими ишини кўриб чиқиши ҳақида хабар берилганди. Бу бўйича суд жараёни якунланиб, суд қарори эълон қилинди.
Келтирилишича, Олий судда тафтиш тартибида кўрилаётган Маъмурий жавобгарлик тўғрисидаги кодекснинг 183-моддаси ва 194-моддаси 1-қисмида назарда тутилган ҳуқуқбузарликларни содир этганликда айбланган Б.Ёқубов ва бошқалар (жами 7 киши)га нисбатан маъмурий ҳуқуқбузарликка оид иш бўйича суд жараёни якунланиб, суд қарори эълон қилинди.
Эълон қилинган суд қарорига кўра маъмурий ҳуқуқбузарлик ҳодисасини тасдиқловчи далиллар етарли бўлмагани сабабл Б.Ёқубов, С.Сидиков, А.Қурбонмуродов, А.Ташов, А.Салимов, Ж.Турғунов ва Х.Зуфаровга нисбатан чиқарилган суд қарорлари бекор қилиниб, маъмурий ҳуқуқбузарликка оид иш Маъмурий жавобгарлик тўғрисидаги кодекснинг 271-моддаси 1-бандига асосан тугатилди.
Иш юзасидан суриштирув ҳаракатларини олиб боришда ҳуқуқбузарлик ҳодисасини тасдиқловчи далилларни тўплаш чораларини кўрмаган ИИБ ходимига нисбатан Ички ишлар вазирлигига, шунингдек, ишни судда кўриб чиқишда ҳуқуқбузарлик ҳодисасини тасдиқловчи далиллар етарли эмаслигига эътибор бермаган судьяларга нисбатан Судьялар малака ҳайъатига хусусий ажримлар чиқариш йўли билан муносабат билдирилди.
Комил Алламжоновга уюштирилган суиқасд
2024 йил 26 октябрь тунда Комил Алламжоновга қуролли ҳужум уюштирилгани ҳақида хабарлар тарқалди. Бош прокуратура берган маълумотга кўра, фуқаро С.С. бошқарувидаги Range Rover русумли автомашина Қибрай тумани, Ифор кўчаси бўйлаб ҳаракатланган вақтида икки нафар номаълум шахс машинага ўқотар қуролдан бир неча маротаба ўқ узиб, номаълум томонга яширинган.
Ҳолат юзасидан Жиноят кодексининг 25, 97-моддаси (қасддан одам ўлдиришга суиқасд қилиш) билан жиноят иши қўзғатилди. 27 октябрь куни ушбу жиноятни содир этган шахсларнинг бири аниқланиб, гумонланувчи тариқасида ушланди. 28 октябрь куни яна уч нафар гумонланувчи ушланди. Ноябрь ойида эса суиқасдда гумонланиб яна 5 киши қамоққа олинди.
27 декабрь куни Бош прокуратура Комил Алламжоновга нисбатан содир этилган қотилликка суиқасд қилиш билан боғлиқ жиноят иши доирасида Чеченистонда яшайдиган икки Россия фуқароси — Бислан Расаев ва Шамил Темирханов Жиноят кодексининг тегишли моддалари билан сиртдан айбланувчи тариқасида жалб қилинганини эълон қилди.
Улар қонунга хилоф равишда Ўзбекистонга кириш ва чиқиш, жиноят ҳақида хабар бермаслик ҳамда ўқотар қуролнинг қонунга хилоф муомаласи каби жиноий ҳаракатларни содир этгани аниқланган. Уларга нисбатан қамоққа олиш тарзидаги эҳтиёт чораси қўлланган ҳолда қидирув эълон қилинган.
10 январь куни инсон ҳуқуқлари фаоли Абдураҳмон Ташанов Комил Алламжоновга суиқасд иши юзасидан ҳарбий судда маҳкама бошланганини маълум қилди.
2025 йил 12 февраль куни Комил Алламжоновга суиқасд бўйича 10 кишига нисбатан суд ҳукми эълон қилинган. Эълон қилинган суд ҳукмига мувофиқ Комил Алламжоновга суиқасд ташкилотчилигида айбланган Жавлон Юнусовга 18 йил-у 6 ой, Шуҳрат Расулов, Шоҳрух Аҳмедов ва Исмоил Жаҳонгировга 23 йил, Дониёр Тошхўжаевга эса 7 йил муддатга озодликдан маҳрум қилиш жазоси тайинланди.
Қолган 5 нафар судланувчига қилмишига мувофиқ равишда турли муддатларга озодликдан маҳрум қилиш жазолари тайинланди.
Комил Алламжонов Telegram саҳифасида пост қолдириб, ҳақиқат ҳеч қачон синмаслиги, барибир юзага чиқишини айтиб ўтди.
Изоҳ (0)