Бўкада 36 ёшли фуқарони уриб ўлдирган Жиноят қидирув бўлими бошлиғи, унинг икки ходими ва “участкавой”га суд ҳукми ўқилди

Тошкент вилоятининг Бўка туманидаги ички ишлар биносида ўғриликда гумонланиб, калтакланган, қийноққа солинган 36 ёшли Усмон Салимбоев кўп ўтмай вафот этгани хабар берилганди. Ички ишлар вазирлигининг ўша пайтда берган баёнотига кўра, ўғриликда гумонланган фуқаро ноқонуний тарзда, тергов хонасида эмас, хизмат хонасида сўроқ қилинган. Сўроқ давомида калтакланган, қийноққа солинган фуқаро ўша куни тунда вафот этган. Тошкент вилояти суди ахборот хизмати масъули Шерзод Худойбердиевнинг “Дарё”га маълумот беришича, марҳум ўлимида гумондорларга суд ҳукми ўқилган. 

2023 йилнинг 1 декабрь куни айбдорларга ҳукм ўқиган Жиноят ишлари бўйича Ўрта Чирчиқ туман суди терговида аниқланишича, 2023 йилнинг 3 июнь куни соат тахминан 22:00 ларда гумонланувчи Усмон Салимбоев Бўка туман ИИБ Жиноят қидирув бўлимининг тезкор ходимлари томонидан процессуал тартиб бузилган ҳолда махсус сўров хонасига эмас, балки хизмат хонасига олиб чиқилиб, бошқа жиноятга алоқадорлиги бўйича суриштирув ўтказилган. Жараёнда фуқаронинг соғлиғи ёмонлашиб, кейинчалик ўлим ҳолати юз берган. 

Тайинланган бирламчи суд-тиббий экспертизасининг ташхисига кўра, марҳумнинг танасида тан жароҳатлари борлиги аниқланган. Ҳолат юзасидан Тошкент вилояти прокуратураси томонидан Жиноят кодексининг 235-моддаси 3-қисми (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан жиноят иши қўзғатилиб, воқеага алоқадор бўлган икки нафар тезкор ходимлар — Ж.Д. ва Ғ.Ш.лар ҳибсга олинган.

Ҳукмда айтилишича, фуқаронинг ўлимига тўрт нафар ходим айбдор деб топилган бўлиб, уларнинг бири Бўка тумани ИИБ Жиноят қидирув бўлими бошлиғи бўлган 37 ёшли Ж.С., қолган икки нафари бўлимнинг тезкор вакиллари — 38 ёшли Д.Ж. ҳамда 31 ёшли Ш.Ғ. бўлган. Шунингдек, мазкур жиноят ишида Бўка тумани ИИБ профилактика инспектори 31 ёшли С.Т. тўртинчи вакил бўлган. 

Суд хулосасига кўра, Бўка тумани ИИБ ЖҚБ бошлиғи бўлган 37 ёшли Ж.С. Жиноят кодексининг 207-моддаси 3-қисми “а” (мансабга совуққонлик билан қараш) банди, 234-моддаси 1-қисми (қонунга хилоф равишда ушлаб туриш ёки ҳибсга олиш), 235-моддаси 2-қисми (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) “а”, “в” бандларида назарда тутилган жиноятларни содир этганликда айбдор деб топилган. Ва унга нисбатан 7 йил муддатга озодликдан маҳрум қилиш жазоси тайинланган. 

38 ёшли тезкор вакил Д.Ж. ва 31 ёшли Ш.Ғ. Жиноят кодексининг 234-моддаси 1-қисми ва 235-моддаси 3-қисмида назарда тутилган жиноятларни содир этганликда айбдор деб топилиб, ҳар бири 8 йил-у 6 ой муддатга озодликдан маҳрум қилинган. Бўка тумани ИИБ профилактика инспектори С.Т. эса Жиноят кодексининг 235-моддаси 2-қисми “а”, “в” бандларида назарда тутилган жиноятни содир этганликда айбдор деб топилиб, 6 йил муддатга озодликдан маҳрум этилган. Уларнинг барчаси 3 йил муддатга ички ишлар органлари тизимида ишлаш ҳуқуқидан маҳрум қилинган.